Por a funksionojnë vërtet këto suplemente?
“Magnezi është në fakt një mineral thelbësor që nevojitet për më shumë se 300 procese në trup,” tha Samantha Cassetty, dietologe e licencuar në New York City. “Ne duhet ta marrim atë nga ushqimi ose nga suplementet, nëse nuk arrijmë të marrim mjaftueshëm përmes dietës.”, shkruan CNN.
Magnezi ndihmon gjumin duke kontribuar në prodhimin e hormonit të gjumit, melatoninës, ndërsa gjithashtu rregullon nivelin e sheqerit në gjak, tensionin e gjakut, prodhimin e energjisë, tretjen dhe shëndetin e kockave, muskujve dhe trurit.
Sasia e rekomanduar ditore për të rriturit varion nga 310 deri në 420 miligramë, të cilat mund të merren nga ushqimet e pasura me magnez. Burime të mira janë perimet me gjethe jeshile të errëta, fasulet, arrat dhe farat, drithërat e plota si quinoa dhe gruri integral, si edhe frutat.
Nëse po mendoni të merrni suplemente magnezi, ato “prodhohen gjithmonë nga burime natyrore, si uji i detit ose mineralet e nxjerra nga toka,” tha përmes emailit John Travis, menaxher teknik në NSF (ish National Sanitation Foundation).
Megjithëse magnezi është shumë i rëndësishëm për shëndetin, nuk ka ende shumë studime shkencore që të vërtetojnë përfundimisht se suplementet e magnezit përmirësojnë gjumin, tha Dr. Anita Shelgikar, drejtoreshë e programit të mjekësisë së gjumit dhe profesoreshë klinike e neurologjisë në Universitetin e Michiganit.
Zgjedhja e suplementit të duhur dhe respektimi i dozimit të rekomanduar janë thelbësore për të shmangur efektet anësore të dëmshme ose të pakëndshme.
Suplementet e magnezit ndryshojnë sipas emrit për shkak të përbërjeve kimike të ndryshme që krijohen kur minerali kombinohet me substanca të tjera, të cilat ndikojnë në mënyrën si përthithet ose tolerohet nga organizmi.
Format më të njohura janë magnez glicinati, magnez citrati, magnez malati, magnez oksidi dhe magnez L-treonati.
Magnez glicinati është forma më e përdorur për gjumin, pasi glicina është një aminoacid që ndihmon mekanizmat e gjumit dhe është i butë për stomakun, sipas Cassetty.
Ndërsa magnez citrati shpesh i surprizon njerëzit, sepse në vend që t’i çojë drejt gjumit, mund t’i detyrojë të shkojnë shpesh në tualet. Citrati tërheq ujë në zorrën e trashë dhe mund të shkaktojë efekt laksativ, dhimbje barku ose gazra, thanë Cassetty dhe Shelgikar.
Pikërisht për këtë arsye përdoret ndonjëherë para procedurave mjekësore si kolonoskopia, operacionet abdominale dhe ekzaminime të tjera të zorrëve. /skyweb.al
