Një kërkesë e thjeshtë për një gotë ujë rubineti në një hotel në Dolomitet italiane ka përfunduar në Gjykatën e Lartë të Italisë, e cila vendosi se shërbimi i ujit nga rubineti nuk është një e drejtë e garantuar për konsumatorin.
Çështja nisi në vitin 2019, kur një turiste kaloi një javë në një hotel me pesë yje në Corvara, në Badia, gjatë festave të Krishtlindjes dhe Vitit të Ri.
Ajo kishte rezervuar qëndrimin ku darka përfshihej në paketë, por pijet jo.
Sipas mediave italiane, gruaja kërkoi disa herë ujë rubineti gjatë darkës, madje duke ofruar edhe ta paguante.
Kërkesa iu refuzua dhe çdo mbrëmje në tavolinë i vendosej një shishe 0.75 litra ujë mineral, me çmim 7 euro.
Turistja u ankua se i ishte mohuar vazhdimisht mundësia për të konsumuar ujë rubineti dhe se ishte detyruar të blinte ujë të ambalazhuar.
Ajo e çoi çështjen në gjykatë, duke argumentuar se uji është burim natyror dhe e drejtë universale njerëzore, ndërsa sigurimi i një sasie minimale është i nevojshëm për plotësimin e nevojave bazë.
Sipas saj, uji i rubinetit duhej të konsiderohej pjesë e shërbimit në një hotel apo restorant, njësoj si çarçafët në dhomë, ngrohja apo sapuni në banjë.
Për këtë arsye, ajo kërkoi 2,700 euro dëmshpërblim për dëm ekonomik dhe shqetësim emocional.
Gjykatat e shkallës së parë dhe të dytë e rrëzuan padinë.
Më pas çështja shkoi në Gjykatën e Lartë të Kasacionit, e cila la në fuqi vendimet e mëparshme.
Gjykata konfirmoi se në Itali nuk ka një ligj që detyron restorantet apo hotelet t’u shërbejnë klientëve ujë rubineti.
Kërkesa për ujë rubineti në restorantet italiane shpesh shihet si e pazakontë, sidomos kur klientit i ofrohet ujë natyral ose me gaz në shishe.
Megjithatë, praktika po bëhet më e zakonshme, sidomos mes klientëve që kërkojnë të shmangin përdorimin e plastikës, ndërsa një pjesë e restoranteve kanë nisur të ofrojnë ujë të filtruar. /TheGuardian
