Një avion Boeing 737-800 i Ryanair, që fluturonte nga Selaniku drejt Memmingenit në Gjermani, pësoi pak ditë më parë një defekt të rëndë në njërin prej motorëve.
Motori i djathtë u dëmtua gjatë fluturimit dhe pjesë të shkëputura prej tij dëmtuan avionin, duke thyer edhe një nga xhamat e kabinës.
Për pasagjerët, një situatë e tillë duket si skenari më i frikshëm: një motor dështon në ajër dhe mendja të thotë se avioni do të rrëzohet. Por avionët modernë janë projektuar pikërisht për të mos u dorëzuar në këto raste.
Çdo avion me dy motorë, përpara se të lejohet të transportojë pasagjerë, certifikohet për të fluturuar, manovruar dhe ulur i sigurt edhe me vetëm një motor.
Në rastin e Ryanair, ekuipazhi shpalli emergjencën dhe avioni u kthye për ulje në Selanik, ku mbërriti i sigurt.
Ekspertët e aviacionit shpjegojnë se kur një motor dështon, motori tjetër merr ngarkesën, ndërsa kompjuterët e fluturimit korrigjojnë parametrat brenda pak çastesh.
Për pilotët, një situatë e tillë nuk trajtohet si panik, por si procedurë: Ndiqet lista e kontrollieve, stabilizohet avioni dhe zgjidhet aeroporti më i përshtatshëm për ulje. Sipas rregullave ETOPS, disa avionë me dy motorë janë të certifikuar të fluturojnë për orë të tëra mbi oqean edhe me një motor të vetëm.
Në disa raste, avionë si Boeing 787 dhe Airbus A350 mund të vazhdojnë fluturimin deri në 330 minuta me një motor, pra rreth 5 orë e gjysmë.
Rreziku kryesor në një dëmtim të pakontrolluar të motorit nuk është thjesht fikja e tij, por fragmentet metalike që mund të godasin trupin e avionit, krahët, sistemet hidraulike apo kabinën.
Pikërisht kjo është arsyeja pse incidenti i Ryanair po hetohet me kujdes, për të zbuluar shkakun e dëmtimit dhe mënyrën si pjesët u shkëputën nga motori. Megjithatë, humbja e një motori nuk do të thotë automatikisht rrëzim.
Avioni është ndërtuar për ta përballuar, pilotët janë trajnuar për këtë skenar dhe aeroportet përgatiten me shërbime emergjence në pistë sa herë ndodh një ulje e tillë.
Prandaj, edhe pse për pasagjerët pamjet e një motori të dëmtuar janë alarmante, për aviacionin modern ky është një skenar serioz, por i parashikuar. /skyweb.al
