Një gabim i mundshëm njerëzor brenda kabinës është bërë shkak për tragjedinë ajrore të Air India më 12 qershor, ku humbën jetën të paktën 270 persona. Raporti paraprak i publikuar nga autoritetet e aviacionit hedh dritë mbi momentet e fundit të fluturimit tragjik, që përfundoi me përplasjen e avionit në një ndërtesë pak sekonda pas ngritjes nga pista.
Sipas dokumentit teknik, vetëm disa sekonda pas ngritjes, çelësat që kontrollojnë furnizimin me karburant për të dy motorët e avionit kaluan nga pozicioni “RUN” (aktiv) në “CUTOFF” (i ndërprerë), duke shkëputur furnizimin me karburant në mënyrë të menjëhershme. Kjo ndodhi brenda një intervali prej më pak se një sekonde.
Regjistrimi nga kabina tregon një moment tensioni mes dy pilotëve. Njëri dëgjohet duke pyetur: “Pse e preke çelësin e ndërprerjes?”, ndërsa tjetri përgjigjet: “Nuk isha unë.”
Përpjekja për të rivendosur funksionimin e motorëve nisi rreth 10 sekonda më vonë, kur sistemi automatik aktivizoi procedurën e rinisjes. Por, koha nuk mjaftoi. Rreth 20 sekonda pas ndërprerjes së karburantit, njëri nga pilotët dha alarmin për rrezik ekstrem: “MAYDAY, MAYDAY, MAYDAY”. Pak çaste më pas, edhe regjistruesi i të dhënave të fluturimit u fik.
Avioni mbante 230 pasagjerë dhe 12 anëtarë të ekuipazhit dhe ishte nisur drejt Mbretërisë së Bashkuar. Përplasja ndodhi pranë aeroportit, duke marrë jetën e të gjithë personave në bord, përveç një të mbijetuari, si dhe duke shkaktuar viktima edhe mes banorëve të ndërtesës ku avioni goditi.
Autoritetet kanë nisur tashmë një hetim të thelluar për të përcaktuar nëse ka pasur një defekt teknik apo një ndërhyrje të paqëllimtë të njërit prej pilotëve, ndërsa ekspertët po shqyrtojnë mundësinë e një gabimi procedural në momentet kritike të ngritjes./skyweb.al
