Udhëtarët që hyjnë në Shqipëri mund të sjellin në bagazhin personal mallra për përdorim vetjak ose dhurata pa paguar detyrime doganore, por vetëm brenda kufijve të përcaktuar.
Sipas Doganës Shqiptare, kufiri i pataksueshëm është 300 euro për person për udhëtarët që hyjnë nëpërmjet rrugëve tokësore dhe 430 euro për ata që mbërrijnë me avion ose me rrugë detare.
Për udhëtarët nën 15 vjeç, vlera e mallrave që mund të futen pa detyrime doganore është deri në 150 euro.
Përjashtimi zbatohet vetëm për mallra të përdorimit personal ose dhurata, të cilat, për nga lloji dhe sasia, nuk kanë karakter tregtar.
Kufij të veçantë zbatohen për produktet e akcizës. Udhëtarët mund të sjellin deri në 200 cigare, 100 cigarillo, 50 puro ose 250 gramë duhan.
Për pijet alkoolike lejohen një litër pije me përmbajtje alkooli mbi 22%, ose dy litra pije me përmbajtje deri në 22%. Gjithashtu lejohen dy litra verë pa gaz dhe deri në 10 litra birrë.
Në bagazhin personal mund të transportohen gjithashtu deri në tre kilogramë kafe. Udhëtarët nën 17 vjeç nuk përfitojnë asnjë përjashtim për produktet e duhanit dhe alkoolit.
Kur vlera ose sasia e mallrave tejkalon kufijtë e lejuar, udhëtari duhet t’i deklarojë ato pranë doganës. Për mallrat që nuk kanë karakter tregtar zbatohet procedura e deklarimit të thjeshtuar.
Dogana ka të drejtë të kërkojë kontrollin e bagazhit dhe të mallrave që udhëtari mban me vete. Autoritetet u bëjnë thirrje qytetarëve të informohen përpara udhëtimit dhe të deklarojnë mallrat kur është e nevojshme, për të shmangur vonesat dhe penalizimet.
