Pas bujës së madhe që shkaktoi emërimi i saj dhe vëmendjes së jashtëzakonshme ndërkombëtare, kryeministri Edi Rama ka qartësuar për herë të parë se “ministrja” e tij e Inteligjencës Artificiale, e quajtur Diella, nuk do të ketë rol vendimmarrës në qeveri.
Në prezantimin e platformës Startup Albania, Rama u ndal te fenomeni mediatik që ka gjeneruar ky eksperiment politik. “Unë kam vendosur qindra ministra ndër vite, por asnjë nuk ka tërhequr vëmendjen e mediave botërore si ky rast. Çdo ditë kemi kërkesa nga gazetarë ndërkombëtarë për të folur për Diellën,” tha ai, duke e pranuar se deri tani është më shumë një projekt simbolik sesa funksional.
Por mes skepticizmit të madh publik, Rama theksoi se Diella nuk është një ministre e mirëfilltë: “Nuk do të marrë vendime, nuk do të ketë të drejtë qeverisjeje. Funksioni i saj është vetëm të përpunojë të dhëna dhe të japë përgjigje të shpejta. Vendimet i merr qeveria, jo Inteligjenca Artificiale.”
Shefi i qeverisë pranoi se ka “shumë keqkuptime” mbi këtë risi, por sipas tij synimi është të përdoret teknologjia për të reduktuar burokracitë dhe për të ulur kostot që qytetarët kanë në komunikimin me administratën.
Kështu, pas jehonës ndërkombëtare dhe debateve të shumta mbi aftësinë e “ministres” së re, Rama duket se ka nisur ta “zhveshë” projektin nga aura politike, duke e vendosur Diellën në kornizën e një asistenteje teknologjike dhe jo të një figure që ndikon realisht në vendimmarrje. /skyweb.al
