Një studim i ri, i prezantuar gjatë javës së Gastroenterologjisë në Berlin, ka zbuluar se konsumimi i vetëm një kanaçeje pije dietike, të njohura si me zero shefqer në ditë mund të rrisë rrezikun për zhvillimin e sëmundjeve në mëlçi (NAFLD) me 60%. Në të njëjtën kohë, pijet me sheqer rrisin këtë rrezik me 50%.
Sëmundjet metabolike mëlçisë, e njohur edhe si MASLD, karakterizohet nga depozitimi i yndyrës në mëlçi te persona që konsumojnë pak ose aspak alkool. Kjo gjendje mund të çojë në dëmtime serioze të mëlçisë, përfshirë cirrozën dhe kancerin e mëlçisë, duke u kthyer në një shqetësim të madh shëndetësor global.
Studimi u zhvillua mbi një grup prej 124,000 personash në Mbretërinë e Bashkuar, të cilët u ndoqën për 10 vite. Konsumi i pijeve u analizua përmes pyetësorëve ushqimorë, ndërsa studiuesit vunë re se edhe pijet dietike, që përmbajnë ëmbëlsues artificialë dhe pak kalori, nuk janë pa rrezik për shëndetin e mëlçisë.
“Ndryshe nga ajo që mendohej më parë, pijet dietike janë të lidhura me një rrezik më të lartë për MASLD edhe në sasi të vogla,” tha Lihe Liu, autore e studimit dhe studente në Universitetin e Soochoë, Kinë.
Studimi gjithashtu tregoi se zëvendësimi i këtyre pijeve me ujë mund të ulë rrezikun për sëmundje të mëlçisë deri në 15%, ndërsa kalimi nga pijet me sheqer te ato dietike, ose anasjelltas, nuk sjell përfitime të dukshme.
Këto rezultate sfidojnë perceptimin që pijet dietike janë një alternativë e sigurt ndaj pijeve të ëmbëlsuara dhe nxisin një rishikim të këshillave për ushqyerjen dhe shëndetin e mëlçisë. /Skyweb.al
