Bashkia Belsh ka shpallur hapjen e garës për krijimin e shtegut turistik Liqeni i Degës – Liqeni i Çestijes – Liqeni Merhojës dhe kompleksit Dumrea Eco Park në Marinëz, me një fond limit prej 16 milionë e 116 mijë lekësh.
Sipas dokumenteve të publikuara në Agjencinë e Prokurimit Publik, projekti synon ndërtimin e një shtegu turistik me gjatësi totale 3 kilometra, që do të shërbejë si rrugë lidhëse mes zonave rekreative Eco Park, Liqeni i Degës dhe Liqeni i Paraskës.
Shtegu, i konceptuar me gjerësi 3 metra, do të përdoret nga këmbësorë, biçiklistë dhe mjete të vogla të mirëmbajtjes.
Dumrea njihet për peizazhin e saj unik natyror të formuar nga dhjetëra liqene karstike, një aset me rëndësi të veçantë për zhvillimin e turizmit natyror dhe ekologjik.
Rruga e re e planifikuar lidh tre pika me interes të lartë rekreativ, ndërsa aktualisht aksesueshmëria është e kufizuar.
Ndërtimi i shtegut pritet të përmirësojë ndjeshëm lëvizshmërinë dhe të krijojë një itinerar të qëndrueshëm për vizitorët dhe banorët.
Projekti parashikon vendosjen e sinjalistikës orientuese dhe informuese për turistët, si edhe rehabilitimin e anëve të shtegut me elementë natyrorë dekorativë, duke siguruar integrim estetik dhe respektim të mjedisit përreth.
Sipas dokumentit, shtegu do të ndikojë pozitivisht në zhvillimin ekonomik të zonës, duke rritur fluksin e vizitorëve, duke nxitur aktivitetet turistike, agroturizmin dhe shërbimet mbështetëse. Gjatë fazës së ndërtimit do të hapen vende pune për komunitetin lokal, ndërsa pas përfundimit pritet rritje e vlerës së pronave dhe forcim i lidhjeve midis komuniteteve.
Punimet do të kryhen në përputhje me parimet e mbrojtjes së mjedisit, duke ruajtur karakterin natyror të peizazhit.
Ndërtimi i shtegut turistik Eco Park – Liqeni i Degës – Liqeni i Paraskës do të forcojë identitetin turistik të Dumresë dhe do të përmirësojë cilësinë e jetës për banorët e zonës, përfundon dokumenti.
