Croatia Airlines do të operojë këtë verë fluturimet e saj nga Tirana drejt Zagrebit me avionët e rinj Airbus A220, modeli më i fundit i avionëve i gjigantit europian që ofron më shumë efikasitet dhe komoditet për pasagjerët.
Croatia Airlines modernizon flotën e avionëve me Airbus A220
Frekuenca e fluturimeve do të jetë tre herë në javë, ndërsa përmes Zagrebit, pasagjerët nga Tirana mund të lidhen me destinacione të tjera brenda Kroacisë apo drejt qyteteve ndërkombëtare, përmes rrjetit të gjerë të Star Alliance, aleancë ku bën pjesë edhe Croatia Airlines.
Çfarë është Airbus A220?
Airbus A220 është një nga avionët më të rinj në tregun ndërkombëtar të aviacionit dhe konsiderohet si një nga më efikasët në kategorinë e tij.
Me kapacitet për 100 deri në 150 pasagjerë, ky avion është projektuar për fluturime me rreze të mesme dhe ofron një përvojë të përmirësuar udhëtimi falë kabinës më të gjerë, sediljeve më të rehatshme dhe zhurmës së reduktuar gjatë fluturimit.
A220 është gjithashtu një avion miqësor me mjedisin, pasi konsumon më pak karburant dhe prodhon më pak emetime CO₂ krahasuar me modelet e mëparshme. Përdorimi i tij nga Croatia Airlines tregon një angazhim për modernizimin e flotës dhe përmirësimin e shërbimit ndaj pasagjerëve. /skyweb.al
