Kursi i këmbimit të Euros me Lekun ka zbritur në nivele rekord, duke mbyllur javën me 97 lekë, sipas kursit zyrtar të Bankës së Shqipërisë. Ky është minimumi më i ulët i regjistruar ndonjëherë për monedhën europiane në tregun vendas.
Pas një ngritjeje të lehtë në fund të gushtit, Euro është rikthyer në rënie të fortë gjatë shtatorit, duke reflektuar ofertën e lartë valutore që vazhdon edhe përtej periudhës kulmore të sezonit turistik. Agjentët e këmbimit valutor pohojnë se hyrjet e mëdha të valutës mbeten faktori kryesor që ushtron presion mbi kursin e këmbimit.
Të dhënat e Bilancit të Pagesave tregojnë se prurjet neto nga turizmi në 6-mujorin e parë të vitit u rritën me më pak se 8%, një shifër ndjeshëm më e ulët krahasuar me vitin e kaluar. Edhe operatorët turistikë kanë vlerësuar se ky sezon veror ka qenë më pak entuziast, çka përkthehet në një ngadalësim të flukseve hyrëse duke mos shpjeguar kështu edhe këto tregues në kursin e këmbimit.
Ndërkohë, deficiti i llogarisë korrente u zgjerua me 19% në tremujorin e dytë të vitit, por për gjithë periudhën janar–qershor 2025 ai ra në 561 milionë euro, duke shënuar një ulje prej 3.1% krahasuar me një vit më parë.
Një tjetër burim i rëndësishëm prurjesh valutore mbeten investimet e huaja direkte, sidomos në sektorin e pasurive të paluajtshme. Megjithatë, të dhënat tregojnë se dinamika e tyre është ngadalësuar, me vetëm 1% rritje krahasuar me një vit më parë. Përveç faktorëve zyrtarë, agjentët e tregut nuk përjashtojnë edhe rolin e prurjeve informale të valutës, që ndikojnë në shtimin e ofertës së euros në treg.
Ekspertët vërejnë se forcimi i Lekut gjatë viteve të fundit është ndikuar edhe nga politika fiskale më shtrënguese, e cila ka sjellë uljen e deficitit buxhetor dhe të borxhit publik. Por, për momentin, tregu po përballet me një situatë ku teprica e valutës në qarkullim ka zbehur fuqinë e monedhës europiane në nivele historike.
