Në zonat bregdetare më të njohura si Ksamil, Himarë, Dhërmi dhe Velipojë, ku janë vërejtur problematika serioze përsa i përket menaxhimit privat të plazheve , përfshirë çmime të larta dhe shërbime të dobëta, bashkitë do të marrin kontrollin e drejtëpërdrejtë të menaxhimit të tyre.
Kryeministri Edi Rama, në episodin e parë të sezonit të ri të podkastit “Flasim”, në rubrikën “Shënimet e javës”, foli për politikën e re të menaxhimit të plazheve, pjesë e programit të mandatit të katërt qeverisës.
Ai theksoi se numri i “beach bareve” do të reduktohet ndjeshëm, ndërsa muzika jashtë ambienteve të lokaleve në zonat e banuara do të ndalohet plotësisht.
Gjithashtu, Rama përmendi ndryshimet që po ndodhin në plazhin e Durrësit, i cili për shkak të vijës së gjatë bregdetare dhe afërsisë me Tiranën, mbetet një ndër destinacionet më të frekuentuara nga turistët. Sipas tij, ky plazh po përjeton një transformim të rëndësishëm, përmes zgjerimit të hapësirës së rërës dhe krijimit të një brezi të ri gjelbërimi.
“Ne do të vijojmë të punojmë pa u ndalur për të ndërtuar një turizëm cilësor, që respekton qytetarët dhe e pozicionon Shqipërinë si një destinacion të lakmuar në Evropë, jo vetëm për bukuritë natyrore, por edhe për standardin e shërbimit”, përmbylli Rama. /Skyweb.al
