“Kjo teknologji është kërcënimi ynë i së ardhmes,” paralajmëron Serhiy Beskrestnov, një konsulent i forcave të mbrojtjes së Ukrainës, pasi kishte analizuar një dron rus të sapo kapur nga forcat ukrainase.
Nuk ishte një dron i zakonshëm. Ai ishte i pajisur me inteligjencë artificiale dhe kishte aftësinë të gjente dhe të sulmonte objektivat pa ndërhyrjen e njeriut. Ndryshe nga modelet e tjera që ai kishte analizuar më parë, ky dron nuk transmetonte apo pranonte sinjale, çka e bënte të pamundur ndërhyrjen apo bllokimin e tij nga sistemet kundërshtare.
Si Rusia ashtu edhe Ukraina po testojnë përdorimin e inteligjencës artificiale në këtë luftë dhe në disa fusha ajo tashmë është duke u përdorur aktivisht, për zbulimin e objektivave, mbledhjen e inteligjencës dhe për çminimin e zonave.
Zëvendësministri i Mbrojtjes së Ukrainës, Yuriy Myronenko, shprehet se inteligjenca artificiale është bërë tashmë e pazëvendësueshme për ushtrinë ukrainase. “Forcat tona të armatosura marrin më shumë se 50 mijë transmetime video nga vijat e frontit çdo muaj, të cilat analizohen nga inteligjenca artificiale,” thotë ai. “Kjo na ndihmon të përpunojmë shpejt të dhënat masive, të identifikojmë objektivat dhe t’i vendosim ato në hartë.”
Teknologjia e fuqizuar nga AI shihet si një mjet që mund të përmirësojë planifikimin strategjik, të maksimizojë përdorimin e burimeve dhe, në fund, të shpëtojë jetë njerëzish.
Në fushëbetejë, sistemet e armatosura të pakontrolluara nga njeriu po pësojnë një transformim të madh. Trupat ukrainase tashmë përdorin softuerë të bazuar në AI që i lejojnë dronët të fiksohen te objektivi dhe më pas të fluturojnë në mënyrë autonome për qindra metra, derisa ta përfundojnë misionin.
Dronë të tillë nuk mund të pengohen me mjete të zakonshme të bllokimit elektronik dhe përmasat e tyre të vogla i bëjnë shumë të vështirë për t’u rrëzuar.
Ekspertët presin që këto sisteme të evoluojnë edhe më tej, në armë plotësisht autonome që mund të kërkojnë dhe të shkatërrojnë objektivat vetë, pa asnjë komandë të drejtpërdrejtë njerëzore.
Yaroslav Azhnyuk, drejtori ekzekutiv i kompanisë ukrainase të zhvillimit teknologjik “The Fourth Laë”, shpjegon se në të ardhmen, një ushtar do të ketë nevojë vetëm të shtypë një buton në një aplikacion telefoni. “Droni do të bëjë pjesën tjetër, do të gjejë objektivin, do të lëshojë eksplozivët, do të vlerësojë dëmin dhe më pas do të kthehet në bazë,” thotë ai.
“Dhe nuk do të nevojiten as aftësi për pilotim nga ushtari,” përfundon Azhnyuk. /Skyweb.al
