Miliarderi Elon Musk ka kritikuar ashpër Bashkimin Europian, duke deklaruar se unioni duhet të shpërbëhet dhe se sovraniteti duhet t’u rikthehet shteteve anëtare. Reagimi i tij erdhi vetëm një ditë pasi Shtëpia e Bardhë publikoi “Strategjinë e Sigurisë Kombëtare”, një dokument rreth 30 faqesh që përshkruan qasjen e re të SHBA-së ndaj kontinentit europian.
Në seksionin e dokumentit të titulluar “Promovimi i Madhështisë Europiane”, theksohet rëndësia strategjike e lidhjeve SHBA–Europë, por njëkohësisht nënvizohet edhe rënia e vazhdueshme ekonomike e Europës. Sipas të dhënave në dokument, në vitin 1990 Europa zotëronte 25% të GDP-së globale, ndërsa sot kjo peshë ka rënë në 14%, duke reflektuar një ngadalësim të dukshëm ekonomik. Ekspertët amerikanë paralajmërojnë se sfida nuk është vetëm ekonomike. Në vlerësimin e tyre, kontinentit i kanoset rreziku i “zhdukjes së qytetërimit”, të nxitur nga politikat e BE-së dhe organizatave transnacionale që, sipas tyre, cenojnë sovranitetin politik, nga migracioni masiv që po ndryshon strukturën shoqërore, nga kufizimet ndaj lirisë së fjalës, rënia e lindshmërisë dhe humbja e identitetit kombëtar.
Strategët paralajmërojnë se nëse këto prirje vazhdojnë, Europa mund të humbasë identitetin e saj brenda dy dekadave. Qasja e ish-presidentit Donald Trump, e ripërsëritur në dokument, synon të nxjerrë Europën nga “fokusi i tepruar mbi rregulloret” dhe t’i rikthejë asaj vetëbesimin në vlerat dhe qytetërimin që e karakterizon.
Si rrugëdalje, SHBA propozon forcimin e bashkëpunimit me vendet europiane, për të rritur konkurrueshmërinë dhe për të frenuar ngritjen e rivalëve globalë që mund të sfidojnë rendin aktual botëror.
Qëndrimi i Musk, i përputhur me linjën politike të Trump, nënvizon një vizion ku sovraniteti kombëtar dhe identiteti i shteteve europiane vlerësohen si elementë kyç për ruajtjen e stabilitetit dhe fuqisë ekonomike e kulturore të kontinentit në vitet e ardhshme.
