Në Zvicër po zhvillohet një debat i gjerë mbi të ardhmen e parasë cash. Më 8 mars, qytetarët do të votojnë për një nismë që synon ta përfshijë në Kushtetutë garantimin me ligj të disponueshmërisë së parasë cash.
Nisma, e titulluar “Po për një monedhë zvicerane të pavarur dhe të lirë në formë monedhash ose kartëmonedhash”, promovohet nga Movimento Svizzero per la Libertà, një lëvizje që u bë e njohur gjatë pandemisë së COVID-19 për qëndrimet e saj kundër vaksinimit.
Qëllimi i saj është të shmangë zhdukjen graduale të parasë fizike, në një kohë kur pagesat elektronike po zënë një peshë gjithnjë e më të madhe. Krahas kartave bankare, në vend përdoret gjerësisht edhe aplikacioni TWINT, i cili mundëson pagesa përmes kodeve QR direkt nga telefoni celular.
Sipas të dhënave të publikuara nga Banka Kombëtare Zvicerane, rreth 95% e popullsisë përdor ende para cash dhe në qarkullim ndodhen afërsisht 73 miliardë franga zvicerane. Megjithatë, rreth 70% e pagesave kryhen tashmë përmes mjeteve elektronike. Më shumë se gjysma e qytetarëve shprehen gjithashtu në favor të heqjes nga përdorimi të monedhave 5 centëshe, të cilat konsiderohen pak praktike.
Në qytetin e Lugano lejohet edhe pagesa e disa taksave me kriptovaluta, duke reflektuar hapjen ndaj teknologjive të reja financiare.
Mbështetësit e nismës argumentojnë se paraja fizike mbetet thelbësore, sidomos në rastet e sulmeve kibernetike ndaj bankave apo reduktimit të bankomateve dhe sporteleve fizike për arsye kursimi. Sipas tyre, frangu zviceran konsiderohet një aset i sigurt, krahas arit dhe pasurive të paluajtshme.
Nisma kërkon gjithashtu që çdo zëvendësim i mundshëm i frangut me një monedhë tjetër, ndonëse aktualisht i largët të miratohet vetëm përmes referendumit popullor.
