Strukturat akomoduese turistike kanë shënuar rritje të numrit të vizitorëve gjatë janarit 2026, krahasuar me të njëjtën periudhë të vitit të kaluar.
Sipas të dhënave zyrtare të publikuara nga Instituti i Statistikave (INSTAT), numri i personave të akomoduar në këto struktura u rrit me 15,1% në krahasim me janarin 2025. Rritja më e ndjeshme u vu re te vizitorët rezidentë, të cilët u shtuan me 16,8%, ndërsa vizitorët jo-rezidentë regjistruan një rritje prej 13,8%.
Edhe netqëndrimet kanë pësuar rritje, me një total prej 9,0%. Në këtë drejtim, netqëndrimet e vizitorëve rezidentë u rritën me 16,4%, ndërsa ato të vizitorëve të huaj me 4,3%.
Sa i përket origjinës së turistëve të huaj, shpërndarja mbetet e ngjashme me tendencat e mëparshme. Italia vazhdon të kryesojë si burimi kryesor i vizitorëve, e ndjekur nga Kosova. Ndërkohë, Gjermania ka fituar më shumë peshë, një trend që vihet re edhe për vizitorët nga Mbretëria e Bashkuar dhe Franca.
Të dhënat e INSTAT tregojnë se 25% e vizitorëve të akomoduar vijnë nga Italia, 14% nga Kosova, 6% nga Gjermania, 5% nga Mbretëria e Bashkuar dhe 4% nga Franca, ndërsa 46% përbëhen nga vende të tjera.
Ndërkohë, norma e shfrytëzimit të dhomave në hotele arriti në 15,4% në janar 2026, nga 14,5% që ishte në të njëjtin muaj të një viti më parë. /skyweb.al
