Bombarduesit strategjikë amerikanë B-1B Lancer kanë ndryshuar ndjeshëm trajektoren e fluturimeve të tyre drejt Lindjes së Mesme, duke shmangur për herë të parë hapësirën ajrore të Francës, një zhvillim që ngre pikëpyetje të forta mbi arsyet operative dhe politike pas këtij vendimi.
Sipas të dhënave të gjurmimit ajror, dy avionë të përfshirë në misionin e fundit, me thirrjet MARCO87 dhe MARCO88, nuk ndoqën më korridorin tradicional mbi Europën kontinentale. Në vend të kësaj, ata fluturuan mbi Atlantik, duke anashkaluar plotësisht Francën.
Rruga e re i çoi bombarduesit përgjatë perëndimit të Gadishullit Iberik, më pas nëpërmjet Ngushticës së Gjibraltarit drejt Mesdheut, për të vazhduar në jug të Italisë dhe Greqisë dhe më pas drejt Lindjes së Mesme.
Ky devijim vjen në një moment kur SHBA ka shtuar misionet e saj ajrore nga baza britanike RAF Fairford drejt rajonit të Gjirit, në kuadër të tensioneve në rritje.
Mungesa e përdorimit të hapësirës ajrore franceze, e cila deri më tani ishte pjesë e itinerarit të zakonshëm, ka ngritur dyshime mbi një ndryshim të mundshëm në qëndrimin e Parisit.
Një nga skenarët është që Franca të ketë kufizuar përkohësisht autorizimet për fluturime ushtarake amerikane, për të shmangur përfshirjen direkte në operacionet e lidhura me situatën në Lindjen e Mesme.
Një tjetër mundësi lidhet me arsye operative, si çështje proceduriale apo kërkesa specifike të misionit që kanë diktuar përdorimin e hapësirës ndërkombëtare për një pjesë më të madhe të fluturimit.
Deri tani nuk ka një reagim zyrtar nga autoritetet franceze, ndërsa mbetet për t’u parë nëse kjo do të kthehet në një praktikë të re për misionet amerikane apo bëhet fjalë vetëm për një rast të izoluar. /skyweb.al
