Rreth 262 MW iu shtuan kapacitetit prodhues vendas të energjisë elektrike gjatë vitit 2025, duke arritur një total prej 3478 MW.
Sipas Entit Rregullator të Energjisë rritja e kapacitetit të instaluar përgjatë vitit erdhi kryesisht si rezultat i shtimit të burimeve të rinovueshme të energjisë elektrike fotovoltaike, të lidhura si në rrjetin e transmetimit, ashtu edhe në rrjetin e shpërndarjes.
Me shtimin e centraleve të rinj, prodhuesit privatë përbëjnë rreth 55% të këtij kapaciteti, ndërsa kapaciteti prodhues i energjisë elektrike i kompanisë publike KESH është 1563 MW dhe përbën rreth 45% të totalit.
Ndërkaq, prodhimi total neto vendas i energjisë elektrike i realizuar për vitin 2025 është 7467 GWh, rreth 50% e të cilit u prodhua nga KESH dhe 50% nga prodhuesit e tjerë.
Në raport me vitin 2024 prodhimi pësoi rënie me 369 GWh, duke nxjerrë edhë njëherë në pah varësinë që ka prodhimi i energjisë elektrike në vendin tonë nga kushtet e motit.
Konsumi total i energjisë elektrike në vitin 2025 arriti në vlerën prej 8345 GWh, duke pësuar rritje me 175 GWh në raport me një vit më parë. Konsumi i energjisë elektrike realizohet nga konsumatorët që furnizohen në tregun e rregulluar dhe konsumatorët të cilët furnizohen në tregun e liberalizuar. /tvscan.al
