Familja Lee, që kontrollon gjigantin teknologjik Samsung Electronics, ka arritur të forcojë ndjeshëm pasurinë dhe kontrollin mbi kompaninë, pavarësisht presioneve të mëdha financiare dhe ligjore pas vdekjes së patriarkut Lee Kun-heenë vitin 2020.
Trashëgimtarët u përballën fillimisht me një taksë trashëgimie prej miliarda dollarësh, ndër më të lartat në botë, si dhe me zhvillime të forta ligjore, pasi një vit më pas djali i tij, Jay Y. Lee, u dënua për korrupsion në lidhje me ish-presidenten e Koresë së Jugut Park Geun-hye.
Megjithatë, pesë vite më vonë, situata ka marrë një kthesë të fortë. Rritja e vlerës së industrisë së gjysmëpërçuesve, e nxitur nga zhvillimet në inteligjencën artificiale, ka çuar pasurinë e familjes në rreth 45.5 miliardë dollarë në mars, pothuajse dyfish nga një vit më parë.
Ky zhvillim e ka ngjitur familjen Lee në vendin e tretë mes familjeve më të pasura në Azi, ndërsa pritet që këtë muaj të mbyllet cikli pesëvjeçar i pagesës së taksës së trashëgimisë, që arrin rreth 8.1 miliardë dollarë.
Në të njëjtën kohë, Jay Y. Lee është rikthyer fuqishëm në skenën publike dhe ekonomike. Ai ka marrë pjesë në misione shtetërore dhe takime të nivelit të lartë ndërkombëtar, duke forcuar praninë globale të grupit në tregje kyçe si India, Kina, SHBA dhe Lindja e Mesme.
Performanca e Samsung ka qenë gjithashtu në nivele rekord. Aksionet e kompanisë u rritën me 126% gjatë vitit të kaluar, rezultati më i mirë në dy dekadat e fundit, ndërsa të ardhurat e shtatë kompanive kryesore të grupit arritën në 19.3% të Prodhimit të Brendshëm Bruto të Koresë së Jugut në vitin 2025.
Rritja e kërkesës për çipa të inteligjencës artificiale po ushqen një cikël të ri global në industrinë e gjysmëpërçuesve, me pritshmëri për zgjerim të mëtejshëm edhe gjatë vitit 2026. Kjo ka lejuar familjen Lee të shmangë shitjen e aksioneve për të mbuluar detyrimet fiskale dhe të ruajë kontrollin mbi kompaninë.
Megjithatë, pavarësisht këtij suksesi, debati mbi reformimin e qeverisjes së korporatave në Korenë e Jugut mbetet i hapur. Analistët theksojnë se fuqia e grupeve të mëdha familjare, të njohura si “chaebol”, vazhdon të jetë vendimtare, duke ngritur pikëpyetje mbi transparencën dhe të drejtat e aksionerëve në të ardhmen.
