Administrata Tatimore ka finalizuar rastin e dytë me rezultate konkrete nga hetimet ndaj agjencive imobiliare, në kuadër të aksionit kundër evazionit fiskal në sektorin e ndërtimit.
Sipas Tatimeve, nga kontrollet dhe analizat financiare janë evidentuar rreth 5.4 milionë euro të ardhura të padeklaruara, të cilat dyshohet se lidhen me komisionet e përfituara nga agjencitë imobiliare gjatë ndërmjetësimit në transaksionet e pasurive të paluajtshme.
Ky është rasti i dytë i bërë publik nga Administrata Tatimore në këtë sektor, pas nisjes së hetimeve të zgjeruara mbi subjektet që operojnë në tregun e pasurive të paluajtshme. Fokusi i kontrolleve është te të ardhurat që krijohen nga komisionet, por që nuk deklarohen në mënyrë të plotë në organet tatimore.
Administrata Tatimore bën të ditur se kontrollet, analizat financiare dhe hetimet do të vijojnë për çdo subjekt që tenton të fshehë të ardhurat dhe të shmangë detyrimet tatimore.
Institucioni thekson se është i gatshëm të bashkëpunojë me tatimpaguesit për formalizimin e ekonomisë, por paralajmëron se aksionet ndaj evazionit fiskal nuk do të ndalen.
Sipas Tatimeve, qëllimi është vendosja e barazisë në treg dhe goditja e praktikave ku të ardhurat krijohen realisht, por nuk pasqyrohen në deklarimet fiskale. /skyweb.al
