Euro ka prekur këtë të premte një tjetër minimum historik në tregun shqiptar, duke zbritur për herë të parë nën kufirin e 95 lekëve.
Sipas kursit zyrtar të Bankës së Shqipërisë, më 12 qershor një euro u këmbye me 94.96 lekë, nga 95.05 lekë një ditë më parë. Të dhënat tregojnë një rënie të vazhdueshme gjatë qershorit, nga 95.42 lekë në fillim të muajit në nivelin më të ulët të regjistruar deri tani.
Dobësimi i monedhës europiane përkon me nisjen e sezonit turistik, periudhë kur në ekonomi hyjnë sasi më të mëdha valutash nga vizitorët e huaj, emigrantët dhe aktivitetet e lidhura me turizmin. Rritja e ofertës së euros në treg ushtron presion në rënie mbi kursin e këmbimit.
Por turizmi nuk konsiderohet faktori i vetëm. Aktorët e tregut dhe ekspertët kanë ngritur prej vitesh shqetësimin se në ekonomi qarkullojnë edhe flukse të mëdha informale valutore, një pjesë e të cilave dyshohet se vjen nga aktivitetet kriminale dhe pastrohet kryesisht përmes sektorit të ndërtimit dhe pasurive të paluajtshme.
Gjatë periudhës 1 janar–12 qershor 2026, euro është këmbyer mesatarisht me rreth 95.95 lekë, nga mesatarja prej 97.3 lekësh gjatë vitit 2025. Kjo përfaqëson një zhvlerësim prej afërsisht 1.4%.
Rënia e euros ka nisur gradualisht që prej vitit 2016, por është përshpejtuar ndjeshëm pas vitit 2023. Në vitin 2015, një euro këmbehej mesatarisht me 139.7 lekë, ndërsa në vitin 2022 kursi kishte zbritur pranë nivelit të 119 lekëve.
Goditja më e fortë u regjistrua në vitin 2023, kur euro humbi rreth 10 lekë brenda një viti dhe zbriti në mesataren prej 108.75 lekësh. Rënia vijoi edhe gjatë vitit 2024, me rreth 8.1 lekë të tjera, ndërsa në vitin 2025 dhe në gjysmën e parë të vitit 2026 nënçmimi ka vazhduar me ritme më të ngadalta.
Në krahasim me vitin 2015, euro ka humbur tashmë afërsisht 44 lekë, ose rreth 31% të vlerës së saj kundrejt monedhës shqiptare.
Përshpejtimi i kësaj tendence lidhet edhe me zgjerimin e vrullshëm të ndërtimit. Vetëm gjatë vitit 2024, sipërfaqja e lejeve të dhëna për ndërtime banimi arriti pranë rekordit prej 2 milionë metrash katrorë. Shkëmbimi i vazhdueshëm i valutës për financimin e projekteve dhe blerjen e pronave rrit ofertën e euros, duke forcuar artificialisht lekun dhe duke rënduar eksportuesit, familjet që marrin remitanca dhe qytetarët që i kanë kursimet në euro.
