Konfirmohet rastit i parë me Ebola në Francë

Pacienti është vendosur në izolim dhe autoritetet shëndetësore kanë nisur gjurmimin e kontakteve të tij, thuhet në deklaratë. Ministria shtoi se rreziku për popullsinë e gjerë evropiane mbetet i ulët. Drejtori i Përgjithshëm i Organizatës Botërore të Shëndetësisë (OBSH), Tedros Adhanom Ghebreyesus, deklaroi të mërkurën se nuk ka arsye për panik.

Tedros tha në një konferencë për shtyp se gjatë 50 viteve të fundit janë regjistruar më pak se 30 raste të Ebolës jashtë Afrikës.

“Kjo do të thotë se rreziku për pjesën tjetër të botës është i ulët. Qoftë Franca apo vende të tjera evropiane, ato nuk duhet të reagojnë në mënyrë të tepruar. Ky është mesazhi që do të doja të përcillja”, u tha ai gazetarëve.

Shpërthimi i Ebolës në Kongo lidhet me variantin e rrallë Bundibugyo të virusit. Sipas OBSH-së, ai ka infektuar më shumë se 1.000 persona dhe ka shkaktuar 267 viktima, duke shënuar numrin më të madh të rasteve të konfirmuara brenda muajit të parë të një shpërthimi të kësaj sëmundjeje.

Ekspertët vlerësojnë se sëmundja ka të ngjarë të ketë qarkulluar për disa muaj përpara se të shpallej zyrtarisht më 15 maj. Rastet e para të konfirmuara u identifikuan në zona urbane, ndërsa më pas infeksionet janë raportuar edhe në të paktën tre kampe të mbipopulluara për personat e zhvendosur.

Dy shpërthimet më të mëdha të Ebolës në histori kanë ndodhur në Afrikën Perëndimore, në Guine, Sierra Leone dhe Liberi gjatë viteve 2014–2016 – si dhe në Kongon Demokratike në vitin 2018.

Një shtetas amerikan, i cili po trajtohej për Ebola në Gjermani, doli nga spitali më herët këtë muaj, pasi që prej 30 majit nuk ishte zbuluar më asnjë gjurmë e virusit në organizmin e tij. /skyweb.al