Industria shqiptare dha sinjale dobësimi gjatë muajit gusht, ndërsa bizneset e sektorit presin njëkohësisht rritje të çmimeve në muajt në vijim.
Sipas vrojtimit të fundit të Bankës së Shqipërisë, treguesi i besimit në industri ra me 1.2 pikë përqindje krahasuar me korrikun.
Rënia u ndikua kryesisht nga vlerësimi më i dobët i bizneseve për kontratat porositëse.
Balanca e porosive zbriti nga -7.1 pikë në korrik në -10.9 pikë në gusht, ndërsa porositë nga eksportet mbetën gjithashtu në territor negativ.
Në të njëjtën kohë, pritjet e kompanive për çmimet e produkteve u rritën ndjeshëm.
Treguesi për pritjet e çmimeve kaloi nga 15.6 pikë në korrik në 21.9 pikë në gusht.
Edhe pritjet për prodhimin në muajt e ardhshëm u dobësuan, duke zbritur nga 26.7 në 22.5 pikë.
Nga ana tjetër, prodhimi aktual gjatë tre muajve të fundit mbeti pothuajse i pandryshuar.
Pavarësisht sinjaleve të dobësimit, besimi në industri vijon të jetë 6.4 pikë mbi mesataren historike.
Të dhënat tregojnë kështu një tablo të përzier: porositë po bien, pritjet për prodhimin po zbehen, ndërsa presionet për rritje çmimesh po forcohen. /skyweb.al
