Mashtrimet telefonike janë kthyer në një fenomen shqetësues në Greqi, ku grupe të organizuara kriminale përdorin qendra thirrjesh për të mashtruar qytetarët, veçanërisht të moshuarit. Autoritetet greke paralajmërojnë se aktiviteti kriminal ka marrë përmasa ndërkombëtare, me rrjete që veprojnë edhe në vende të tjera të rajonit.
Ministri grek i Mbrojtjes së Qytetarëve, Michalis Chrysochoidis, e cilësoi fenomenin si një “epidemi” dhe njoftoi se autoritetet po punojnë për krijimin e një strukture të përhershme operative për luftimin e mashtrimeve telefonike dhe elektronike.
Duke folur për televizionin Mega, Chrysochoidis tha se grupet kriminale kanë zhvilluar mënyra të sofistikuara për t’u marrë paratë dhe pasurinë viktimave.
Sipas ministrit, hetimet e zhvilluara deri tani kanë çuar në arrestime të shumta dhe një pjesë e të dyshuarve ndodhen në burg, por aktiviteti kriminal vazhdon të shfaqet në forma të reja.
Një nga aspektet më shqetësuese për autoritetet greke është shtrirja ndërkufitare e këtyre grupeve. Chrysochoidis tha se organizatat kriminale nuk veprojnë vetëm brenda Greqisë, por krijojnë dhe përdorin qendra thirrjesh në vende të ndryshme të Evropës.
Ai përmendi konkretisht Shqipërinë, Shkupin dhe Sofjen, duke folur për struktura transnacionale që bashkëpunojnë në realizimin e mashtrimeve.
“Ka një qendër thirrjesh në Shqipëri, për shembull, ka një qendër thirrjesh në Shkup, në Sofje”, deklaroi ministri, duke theksuar se bëhet fjalë për grupe të organizuara që veprojnë përtej kufijve.
Fenomeni nuk kufizohet vetëm te telefonatat mashtruese. Sipas Chrysochoidis, grupet kriminale janë përfshirë gjithnjë e më shumë edhe në mashtrime elektronike, ku në disa raste përfshihen shuma të konsiderueshme parash.
Ministri përmendi operacionet e zhvilluara nga autoritetet greke, përfshirë shërbimet e sigurisë në Atikë, si dhe bashkëpunimin me autoritete ndërkombëtare në hetimin e rasteve.
Megjithatë, sipas tij, arrestimet individuale nuk mjaftojnë për t’i dhënë fund fenomenit. Për këtë arsye, autoritetet greke synojnë ngritjen e një mekanizmi të përhershëm që do të merret në mënyrë të koordinuar me këto raste.
Chrysochoidis u shpreh optimist për rezultatin e kësaj përpjekjeje.
“Ne do t’i arrestojmë të gjithë. Na duhet vetëm një strukturë e përhershme dhe një politikë operative e përhershme për t’i dhënë fund kësaj gjëje”, deklaroi ministri grek.
