Presidenti i Republikës, Bajram Begaj, priti këtë të mërkurë ambasadoren e re të Delegacionit të Bashkimit Evropian në Shqipëri, Sofia Moreira de Sousa, e cila paraqiti letrat kredenciale.
Kreu i shtetit i uroi ambasadores suksese në detyrën e re dhe vlerësoi rolin e Delegacionit të BE-së në forcimin e marrëdhënieve mes Shqipërisë dhe Bashkimit Evropian.
Gjatë takimit, Begaj dhe Moreira de Sousa diskutuan mbi ecurinë e negociatave dhe reformat që duhen përmbyllur për anëtarësimin e Shqipërisë në BE deri në vitin 2030.
Presidenti u shpreh se vendi ka hyrë në një fazë të avancuar të procesit të integrimit dhe theksoi se lufta kundër korrupsionit dhe garantimi i pavarësisë së institucioneve të drejtësisë mbeten thelbësore.
Ai vlerësoi reformën në drejtësi si një nga provat më të forta të angazhimit të Shqipërisë për të përmbushur standardet evropiane.
Në takim u nënvizua gjithashtu edhe harmonizimi i plotë i Shqipërisë me Politikën e Jashtme dhe të Sigurisë të Bashkimit Evropian.
Begaj shprehu bindjen se marrëdhëniet mes Tiranës dhe Brukselit do të forcohen më tej gjatë mandatit të ambasadores së re.
Duke iu drejtuar Sofia Moreira de Sousa-s, Presidenti deklaroi se shpreson që deri në përfundim të mandatit të saj, Shqipëria të jetë bërë anëtare e Bashkimit Evropian.
