Pas një serie takimesh me strukturat socialiste nëpër qarqe, Edi Rama mbledh sot në një tryezë Grupin Parlamentar të PS-së dhe anëtarët e qeverisë, ndërsa pritshmëritë për ndryshime në kabinet janë rritur, kjo edhe nga shtimi i papritur i aktivitetit të ministrave në rrjetet sociale.
Takimi do të zhvillohet në orën 10:00 në Pallatin e Brigadave dhe, përtej diskutimeve organizative, pritet me interes për sinjalet që kryeministri mund të japë mbi përbërjen e qeverisë.
Në fokus zyrtar është koncepti “Prania Besnike”, përmes të cilit deputetëve, drejtuesve politikë dhe strukturave vendore u kërkohet një prani më e vazhdueshme pranë qytetarëve dhe ndjekje direkte e problematikave në territor.
Por mbledhja vjen në një moment kur presioni për ndryshime në qeveri është rritur ndjeshëm dhe Rama duket se po i afrohet vendimit përfundimtar mbi kabinetin e tij.
Edhe në janar, disa nga lëvizjet në qeveri u njoftuan pikërisht gjatë një mbledhjeje të përbashkët mes deputetëve socialistë dhe ministrave, çka e shton edhe më shumë pritshmërinë për takimin e sotëm.
Një ditë më parë u zhvillua mbledhja e parë e qeverisë për sezonin e ri, ku u mësua edhe dorëheqja e ministres së Shëndetësisë, Evis Sala, pas afro një viti në detyrë.
Atmosfera e pritjes është reflektuar edhe në rrjetet sociale. Gjatë javëve të fundit, ministra dhe drejtues të rëndësishëm institucionesh kanë shumëfishuar postimet për aktivitetet e tyre, duke u kthyer thuajse në “blogerë” të punës së përditshme.
Takimi i sotëm mund të shërbejë kështu edhe për të ulur presionin e pritshmërive që është krijuar brenda mazhorancës, përpara se Rama të bëjë të qartë se kush qëndron dhe kush largohet nga kabineti. /skyweb.al
