Aeroporti Ndërkombëtar i Tiranës ka regjistruar rreth 6 milionë pasagjerë gjatë gjashtëmujorit të parë të vitit 2026, duke shënuar një tjetër rekord të trafikut ajror.
Krahasuar me të njëjtën periudhë të vitit të kaluar, numri i udhëtarëve është rritur me rreth 17%, duke e vendosur TIA-n në krye të aeroporteve të rajonit për volum pasagjerësh.
Shifrat u publikuan edhe nga kryeministri Edi Rama, i cili theksoi se aeroporti i kryeqytetit vijon të ruajë ritme të larta zgjerimi.
“Aeroporti Ndërkombëtar i Tiranës kryeson aeroportet e rajonit për numrin e pasagjerëve në gjashtëmujorin e parë të vitit 2026. Gjashtë milionë pasagjerë në vetëm gjashtë muaj, me një rritje prej 17% krahasuar me të njëjtën periudhë të vitit 2025”, shkroi Rama.
Tirana rezultoi gjithashtu aeroporti me rritjen më të shpejtë në kategorinë e aeroporteve të mëdha europiane, me një zgjerim prej 17.2% gjatë gjysmës së parë të vitit. Të dhënat e ACI Europe e rendisin përpara Tashkentit, Maltës, Krakovit dhe aeroportit Linate të Milanos.
Rritja lidhet me zgjerimin e destinacioneve, shtimin e fluturimeve dhe numrin më të lartë të turistëve që vizitojnë Shqipërinë. Nëse ritmet vijojnë, viti 2026 pritet të sjellë një tjetër rekord historik për aeroportin e Rinasit.
