Ish-zëvendëskryeministri Arben Ahmetaj ka publikuar në emisionin “Çim Peka Live” një audiopërgjim, ku pretendon se dëgjohet biznesmeni izraelito-shqiptar Ron Yeffet duke biseduar me dy persona, njëri ukrainishtfolës dhe tjetri rusishtfolës.
Në një prej momenteve të regjistrimit, personi që Ahmetaj identifikon si Yeffet dëgjohet duke deklaruar: “Qeveria shqiptare më ka pajtuar për të bërë të gjitha gjërat e këqija”.
Sipas Ahmetajt, biseda lidhet fillimisht me përpjekjet për të marrë nën kontroll gazin e Delvinës, përmes një skeme të ngjashme me atë të kompanisë shtetërore të industrisë ushtarake KAYO.
Ai pretendon se modeli funksionon përmes krijimit të kompanive të përbashkëta, ku privati zotëron 80% të aksioneve dhe shteti vetëm 20%, ndërsa paratë publike dhe kontratat kalojnë pa tender te kompanitë private.
Por akuzat shtrihen edhe te industria ushtarake. Sipas Ahmetajt, në bisedat e përgjuara flitet për trafik armësh, me materiale që do të silleshin nga Afrika në Shqipëri për t’u paketuar dhe më pas për t’u rieksportuar.
Ahmetaj e lidhi këtë skemë me kompaninë “Timak Defence”, partneritet mes privatit dhe KAYO-s, duke pretenduar se janë dhënë miliarda lekë paradhënie nga buxheti pa investim real nga kapitali privat.
Në bisedë, sipas tij, pala e huaj ngre shqetësimin se operacionet nuk mund të kryhen pa tenderë për shkak të mbikëqyrjes së NATO-s, ndërsa Yeffet këmbëngul për procedura pa garë në Shqipëri.
Ish-zëvendëskryeministri përmendi edhe rastin e tre raketave antitank “Akeron” të gjetura në një furgon në portin e Barit. Automjeti kishte mbërritur me traget nga Patra, ndërsa Ahmetaj u bëri thirrje gazetarëve të hetojnë nëse rasti mund të ketë lidhje me Shqipërinë.
“Jemi duke folur për trafik armësh, ku një palë flet për tendera. Shikojeni rastin ku në Itali është kapur një furgon me raketa lufte, sepse mund të zbuloni gjëra shumë interesante”, deklaroi Ahmetaj.
Akuzat e ngritura prej tij për trafikun e armëve, përfshirjen e qeverisë dhe rolin e Ron Yeffet mbeten pretendime të pakonfirmuara nga institucionet hetimore. Deri tani nuk ka një reagim publik nga qeveria apo nga vetë Yeffet për audiopërgjimin. /skyweb.al
