Sezoni veror ka sjellë një rritje të ndjeshme të çmimeve për lëvizjen, argëtimin dhe shërbimet turistike në Shqipëri. Të dhënat e INSTAT tregojnë se në gusht transporti kushtoi 7% më shumë se një vit më parë, ndërsa çmimet e argëtimit, sportit dhe kulturës u rritën me 8.5%.
Shtrenjtimi ka prekurur edhe restorantet dhe strukturat akomoduese. Çmimet në këtë grup ishin 3.5% më të larta krahasuar me gushtin 2025 dhe u rritën me 0.3% vetëm gjatë muajit të fundit.
Tre grupet që lidhen ngushtë me lëvizjen, pushimet dhe konsumin gjatë sezonit turistik dhanë së bashku 1.65 pikë përqindje në inflacionin e harmonizuar prej 3%.
Kjo do të thotë se transporti, argëtimi dhe shërbimet e hoteleri-restoranteve prodhuan rreth 55% të rritjes vjetore të çmimeve të matur nga ky indeks. Megjithatë, këto kategori nuk lidhen vetëm me turistët, pasi përfshijnë edhe shpenzimet e kryera nga qytetarët shqiptarë.
Transporti dha një kontribut prej 0.59 pikë përqindjeje në inflacion, argëtimi, sporti dhe kultura 0.55 pikë, ndërsa restorantet dhe shërbimet e akomodimit 0.51 pikë përqindjeje.
Ushqimet dhe pijet joalkoolike mbetën grupi me ndikimin më të madh individual, duke kontribuar me 0.74 pikë përqindjeje. Çmimet e tyre ishin 2.1% më të larta se në gushtin e vitit të kaluar.
Në total, inflacioni i harmonizuar në Shqipëri rezultoi 3% në gusht, lehtësisht nën mesataren prej 3.2% të Bashkimit Europian. Krahasuar me korrikun, çmimet e konsumit u ulën me 0.1%, kryesisht për shkak të rënies me 0.9% të çmimeve të ushqimeve dhe veshjeve.
Por kjo ulje e përgjithshme nuk u reflektua te kostot e transportit. Vetëm brenda gushtit, çmimet e këtij grupi u rritën me 2.1%, duke e bërë lëvizjen një nga zërat me shtrenjtimin më të fortë të muajit.
Çfarë është inflacioni i harmonizuar?
Indeksi i Harmonizuar i Çmimeve të Konsumit, i njohur si IHÇK, është një tregues i ndërtuar sipas së njëjtës metodologji në vendet europiane. Ai përdoret për të krahasuar nivelin e inflacionit të Shqipërisë me atë të vendeve të Bashkimit Europian dhe vendeve të tjera të kontinentit.
Ndryshe nga Indeksi i Çmimeve të Konsumit, që është matësi zyrtar i inflacionit në Shqipëri, IHÇK përfshin të gjitha shpenzimet e kryera brenda territorit shqiptar. Në të llogariten jo vetëm blerjet e familjeve shqiptare, por edhe shpenzimet e turistëve të huaj që vizitojnë vendin.
Për këtë arsye, restorantet dhe shërbimet e akomodimit kanë një peshë shumë më të madhe në indeksin e harmonizuar. Ato përfaqësojnë 14.45% të shportës së IHÇK-së, kundrejt 5.7% që kanë në indeksin zyrtar shqiptar të çmimeve të konsumit.
Të dhënat e gushtit tregojnë se sezoni veror nuk ka sjellë vetëm më shumë vizitorë dhe të ardhura për bizneset, por edhe një presion të dukshëm mbi çmimet e transportit, argëtimit, restoranteve dhe akomodimit. /skyweb.al
