Kryeministri Edi Rama e ka cilësuar historik rekomandimin e Komisionit Europian për nisjen në vitin 2027 të përgatitjeve për hartimin e traktatit të anëtarësimit të Shqipërisë në Bashkimin Europian.
Gjatë fjalës së tij në Asamblenë e Partisë Socialiste, Rama u ndal edhe te protestat e opozitës, të cilat i akuzoi për instrumentalizim politik dhe dhunë ndaj qeverisë. Sipas tij, kjo situatë rrezikon të largojë vëmendjen nga një moment i rëndësishëm në rrugëtimin europian të vendit.
“KE ka bërë një rekomandim historik për ne, që është një pohim i madh për faktin që Shqipëria ndodhet në pikën më të lartë drejt rrugës në bashkimin me familjen e madhe europiane. I rekomandohet KE të nisë përgatitjet në vitin 2027 për të hartuar traktatin për anëtarësimin e Shqipërisë në BE. Ky është një togfjalësh që shfaqet për herë të parë në historinë e Shqipërisë”, deklaroi Rama.
Kreu i qeverisë e lidhi këtë zhvillim me punën e bërë ndër vite nga qeverisja socialiste, duke përmendur reformën në drejtësi dhe ndryshimet në sektorin e energjisë.
Ai u shpreh se rruga drejt këtij momenti ka qenë e gjatë dhe e shoqëruar me përplasje të forta, veçanërisht gjatë zbatimit të reformës në drejtësi.
“Sot Europa është e prekshme me sy, përmes vetë gishtit të KE, që tregon se ky është momenti për të nisur përgatitjet për traktatin historik që do ta bëjë Shqipërinë anëtare të BE”, u shpreh kryeministri.
Rama përmendi gjithashtu zhvillimin e qyteteve dhe rritjen e turizmit, duke theksuar se Shqipëria ka ndryshuar ndjeshëm krahasuar me vitin 2013.
