Në një njoftim zyrtar të publikuar në rrjetet sociale, Tirana International Airport thekson se operimet në aeroport po zhvillohen normalisht dhe pa ndërprerje.
Sipas njoftimit, “të gjitha operimet po zhvillohen sipas planifikimit, ndërsa furnizimi me karburant garanton vazhdimësi të plotë dhe të sigurt të shërbimit për të gjitha linjat ajrore”.
TIA siguron se kompanitë ajrore që operojnë në aeroport po marrin shërbim të plotë dhe të pandërprerë të furnizimit me karburant, në përputhje me standardet më të larta të sigurisë dhe operimit.
Në të njëjtën kohë, aeroporti nënvizon se prioritet mbetet siguria dhe ofrimi i një eksperience të besueshme për çdo pasagjer.
Reagimi vjen në një moment kur çështjet e furnizimit me karburant janë kthyer në shqetësim në disa tregje ndërkombëtare, por sipas autoriteteve të aeroportit të Tiranës, në Shqipëri situata paraqitet e stabilizuar dhe pa ndikim në fluturime.
TIA rithekson angazhimin për të garantuar vijueshmërinë e operimeve dhe për të ofruar një shërbim cilësor për të gjithë përdoruesit e aeroportit. /skyweb.al
