Me nisjen e Kupës së Botës 2026 më 11 qershor, autoritetet shëndetësore ndërkombëtare po përgatiten për një tjetër sfidë krahas organizimit sportiv: menaxhimin e rrezikut nga përhapja e sëmundjeve infektive. Turneu do të zhvillohet në 16 qytete të SHBA-së, Kanadasë dhe Meksikës, duke sjellë miliona tifozë nga e gjithë bota dhe duke krijuar kushte ideale për qarkullimin e viruseve dhe infeksioneve.
Ekspertët vlerësojnë se, megjithëse ngjarje të tilla rrallë shkaktojnë epidemi të mëdha, grumbullimet masive në stadiume, aeroporte, hotele dhe transport publik rrisin mundësinë e shpërthimeve lokale dhe testojnë kapacitetet e sistemeve shëndetësore.
Një nga shqetësimet më të përfolura është Ebola, pas shpalljes së emergjencës globale shëndetësore për shkak të një shpërthimi në Afrikën Qendrore. Megjithatë, specialistët theksojnë se rreziku i transmetimit gjatë Botërorit mbetet shumë i ulët, pasi virusi përhapet vetëm përmes kontaktit të drejtpërdrejtë me lëngjet trupore dhe jo përmes ajrit.
Ndërkohë, kërcënimi më i madh konsiderohen infeksionet respiratore si fruthi, gripi dhe COVID-19. Fruthi po regjistron rritje të ndjeshme të rasteve në SHBA, ndërsa grumbullimet e mëdha të njerëzve mund të favorizojnë transmetimin e shpejtë të këtyre sëmundjeve. Autoritetet amerikane raportojnë mbi 2 mijë raste të fruthit vetëm gjatë vitit 2026, një nivel shumë më i lartë krahasuar me vitet e fundit.
Vëmendje po i kushtohet edhe sëmundjeve të transmetuara nga mushkonjat, si dengue, ethet e verdha dhe virusi Oropouche, veçanërisht në zonat jugore të SHBA-së dhe në qytetet pritëse të Meksikës, ku kushtet klimatike favorizojnë përhapjen e tyre.
Ekspertët paralajmërojnë gjithashtu për rritjen e infeksioneve seksualisht të transmetueshme gjatë ngjarjeve të mëdha ndërkombëtare. Sëmundje si mpox dhe sifilisi vijojnë të qarkullojnë në disa vende, ndërsa studimet tregojnë se një pjesë e konsiderueshme e udhëtarëve përfshihen në marrëdhënie seksuale rastësore gjatë udhëtimeve.
Autoritetet shëndetësore këshillojnë tifozët të jenë të vaksinuar, të respektojnë masat bazë të higjienës dhe të tregojnë kujdes gjatë udhëtimeve, në mënyrë që festa më e madhe e futbollit të mos shoqërohet me pasoja për shëndetin publik./skyweb.al
