Kompania europiane Airbus ka njoftuar një ndërhyrje të menjëhershme në software-in e një numri të madh avionësh të familjes A320, një nga modelet më të përdorura në botë, raporton Reuters.
Sipas burimeve të industrisë, pjesa e prekur përfshin mijëra avionë, duke shkaktuar potencialisht një nga ndërhyrjet më të mëdha teknike në historinë 55-vjeçare të Airbus.
Kjo ndërhyrje duhet të kryhet para fluturimit të radhës, çka nënkupton anulime dhe vonesa të menjëhershme në një periudhë të ngarkuar udhëtimesh në mbarë botën.
Pse po ndodh ndërhyrja?
Airbus bëri të ditur se një incident i fundit me një avion të familjes A320 zbuloi se rrezatimi intensiv diellor mund të ndikojë në të dhëna kritike të sistemit të kontrollit të fluturimit. Problemi lidhet me kompjuterin e kontrollit ELAC, i cili komandon pozicionimin e pjesëve që kontrollojnë këndin e avionit.
Incidenti lidhej me një fluturim të JetBlue nga Cancún drejt Newark, që pësoi ulje të menjëhershme të pa komanduar dhe devijoi në Tampa pas dëmtimeve të pasagjerëve.
Agjencia Europiane e Sigurisë së Aviacionit (EASA) pritet të lëshojë një direktivë emergjente për detyrimin e zgjidhjes software.
Sa zgjat ndërhyrja?
Për rreth 2/3 e avionëve, linjat ajrore do të rikthehen në një version të mëparshëm software, një proces që zgjat rreth dy orë.
Megjithatë, qindra avionë mund të kërkojnë edhe ndryshim hardware, që mund të çojë në vonesa shumë më të gjata.
Në total, janë mbi 11,300 avionë A320 në përdorim globalisht.
Si preket Shqipëria?
Nga ndërhyrja mund të preken edhe fluturimet nga dhe drejt Shqipërisë, pasi avionët A320 përdoren gjerësisht nga linja që operojnë këtu, përfshirë:
Wizz Air
easyJet
Austrian Airlines
Aegean Airlines
Lufthansa
Eurowings
- Pegasus
- Air Albania
- Vueling
- British Airways
Wizz Air ka njoftuar se ka identifikuar avionë ku do të ndërhyjnë teknikët dhe se do të ketë probleme me fluturimet në orët dhe ditët në vijim.
Cilat linja të mëdha preken?
American Airlines ka 340 avionë A320 që kërkojnë ndërhyrje.
Wizz Air ka njoftuar se avionët e saj të prekur do të futen në proces.
United Airlines deklaroi se nuk preket.
Kjo është një nga ndërhyrjet më të mëdha teknike të Airbus, që vjen vetëm pak javë pasi A320 u bë modeli më i prodhuar në histori, duke kaluar Boeing 737.
Pritet që situata të shkaktojë vonesa globale, sidomos në Europë dhe SHBA, ndërsa kompanitë nxitohen të kryejnë përditësimet para fluturimit të radhës.
Në orët dhe ditët në vijim, pasagjerët shqiptarë pritet të përballen me ndërprerje në orare, ndaj këshillohet verifikim i vazhdueshëm i statusit të fluturimeve. /skyweb.al
