Sokol Sinani, pronari i kompanisë Intech+, mban bllokuar prej shtatorit 2025 tenderin 2.5 milionë euro të AKSHI-t për sistemin e regjistrit elektronik të titujve akademikë, një projekt që synon digjitalizimin e gradave shkencore dhe dokumentacionit universitar në nivel kombëtar.
Tenderi për titujt akademikë parashikon ndërtimin e një platforme që do të menaxhojë në mënyrë të centralizuar të dhënat për gradat shkencore, doktoraturat dhe publikimet, duke qenë një nga projektet më të rëndësishme të infrastrukturës digjitale në arsimin e lartë.
Siç konstaton skyweb.al përmes konsultimit të dokumentacionit të Komisionit të Prokurimit Publik, procedura ka hasur pengesa të vazhdueshme.
Që nga shpallja në shtator 2025, ajo është bllokuar dy herë për shkak të ankimimeve të Intech+.
Fillimisht, në fund të vitit 2025, procesi u ndal për shkak të kërkesave për ndryshime në dokumente. Më pas, në fillim të vitit 2026, një tjetër ankimim solli ndërhyrje të reja dhe pamundësi për vijimin normal, duke çuar në përshkallëzimin e situatës proceduriale.
Aktualisht, sipas vendimit të fundit të Komisionit të Prokurimit Publik, procedura ndodhet në fazë anulimi dhe pritet të rishpallet me ndryshimet përkatëse, ç’ka e rikthen projektin praktikisht në pikën zero.
Ky zhvillim vjen në një moment të ndjeshëm për AKSHI, e cila ndodhet në qendër të një hetimi të gjerë nga SPAK lidhur me korrupsion madhor në tendera dhe pengmarrje të konkurrentëve.
Ish-drejtuesit e AKSHI-t, Mirlinda Karçanaj dhe Hava Delibashi ndodhen nën arrest, kurse personazhe të tjerë që konsiderohen si “truri” i skandalit sipas SPAK, si Ergys Agasi dhe Ermal Beqiri, janë në arrati, ndërsa kompani të lidhura me ta kanë nisur lëvizjet për shitjen e aksioneve në pritje të prangave.
Në këtë klimë tensioni institucional, ish-drejtoresha Mirlinda Karçanaj është larguar nga detyra.
Bllokimi i tenderit për titujt akademikë shihet si një tjetër episod që thekson pasigurinë dhe ngadalësimin e projekteve digjitale strategjike në një nga institucionet kyçe të transformimit elektronik në vend. /skyweb.al
