Dy ditë përpara protestës së paralajmëruar për të dielën në Kakome, është hequr porta që prej vitesh kufizonte hyrjen drejt plazhit.
Porta është larguar me ndihmën e një vinçi, ndërsa ende nuk dihet zyrtarisht se kush ka dhënë urdhrin për heqjen e saj.
Ky zhvillim vjen pas rreth 20 ditësh protestash dhe reagimesh publike kundër asaj që organizatorët e lëvizjes e konsiderojnë përvetësim të pasurive publike dhe private në zonë.
Fakti që porta u hoq vetëm pak ditë para protestës së paralajmëruar po shihet nga protestuesit si rezultat i presionit qytetar dhe vëmendjes së shtuar mediatike.
Për mbështetësit e kauzës, largimi i pengesës fizike është një hap i rëndësishëm drejt rikthimit të aksesit publik në Kakome, një zonë që prej vitesh ka qenë në qendër të debateve për pronën, zhvillimin dhe të drejtën e qytetarëve për të hyrë lirisht në bregdet.
