Qeveria miratoi këtë të enjte një paketë vendimesh në fushën e mbrojtjes, që prek industrinë ushtarake, kantierin detar të Pashalimanit dhe angazhimet e Shqipërisë në misione jashtë vendit.
Ministri i Mbrojtjes, Ermal Nufi, bëri të ditur se ndryshimet në ligjin për TVSH-në synojnë të lehtësojnë procedurat për kompanitë me të cilat janë lidhur marrëveshje në industrinë e mbrojtjes.
Sipas tij, masat do të mbështesin ngritjen e fabrikave për prodhimin e pajisjeve ushtarake dhe sjelljen e teknologjive të reja në Shqipëri.
Një tjetër vendim parashikon mbylljen e kantierit të vjetër të Pashalimanit dhe vënien e tij në dispozicion të kompanisë italiane Fincantieri.
Projekti do të zhvillohet në bashkëpunim me shoqërinë shtetërore KAYO, përmes një sipërmarrjeje të përbashkët.
Në kantier pritet të prodhohen anije me gjatësi deri në 82 metra, duke zgjeruar aktivitetin e ndërtimit detar në vend. Kabineti miratoi gjithashtu përfshirjen e Shqipërisë në një mision ndërkombëtar në Gaza.
Në fazën e parë do të dërgohen katër oficerë shtabi, ndërsa numri i trupave të tjera do të vendoset pas vlerësimit të angazhimit. Një vendim i veçantë u miratua edhe për vijimin e misionit të Forcave të Armatosura në Letoni.
Qeveria autorizoi gjithashtu shpërblime për zjarrfikësit, forcat e mbrojtjes dhe efektivët e angazhuar në operacionet kundër zjarreve.
Sipas ministrit, gjatë këtij viti janë menaxhuar 27 vatra masive, me angazhimin e mbi 1,380 forcave, pesë helikopterëve dhe 90 mjeteve. /skyweb.al
