Qeveria ka miratuar ngritjen e Institutit Kombëtar të Tumoreve, i pari i këtij lloji në Shqipëri, që do të ndërthurë trajtimin klinik, mësimdhënien dhe kërkimin shkencor.
Ministrja e Shëndetësisë dhe Mirëqenies Sociale, Evis Sala, tha se institucioni do të ndërtohet sipas modeleve europiane, duke marrë si referencë Institutin Kombëtar të Tumoreve në Milano.
Struktura do të ofrojë kirurgji, kimioterapi dhe radioterapi, ndërsa do të shërbejë edhe për formimin e profesionistëve dhe zhvillimin e kërkimit shkencor.
Brenda institutit do të ngrihet edhe një njësi për studimet klinike, e cila synon t’u krijojë pacientëve mundësi për t’u përfshirë në programe ndërkombëtare.
Sipas ministres, përfshirja në rrjetin europian të qendrave shkencore mund t’i hapë rrugë përfitimit të fondeve për barna dhe teknologji.
Instituti do të ketë gjithashtu rol koordinues për pikat e trajtimit të tumoreve në vend.
Aktualisht funksionojnë tetë pika, ndërsa një tjetër pritet të hapet në Fier.
Qeveria miratoi edhe heqjen e kufirit të sipërm të moshës për programin e kontrollit bazë shëndetësor.
Çdo qytetar nga mosha 35 vjeç e lart do të ketë të drejtë të përfitojë check-up falas.
Duke nisur nga shtatori, programi do të përfshijë edhe qytetarët mbi 70 vjeç.
Një tjetër vendim lidhet me kalimin nën administrimin e shtetit të shërbimeve të check-up-it dhe dializës.
Kontratat aktuale me koncesionarët përfundojnë përkatësisht në shtator dhe nëntor, pas së cilës të dyja shërbimet do të ofrohen nga shteti.
