SPAK ka nisur procedurat për sekuestrimin e pasurive që Ermal Beqiraj zotëron në Francë.
Kreu i Prokurorisë së Posaçme, Klodian Braho, deklaroi se procesi është ende në zhvillim dhe se një njoftim zyrtar pritet të publikohet së shpejti. I pyetur nëse kërkesa përfshin edhe avionin që drejtohej nga Beqiraj, për të cilin është raportuar se ishte në pronësi të tij, Braho tha se masa nuk kufizohet vetëm te mjeti fluturues.
Sipas tij, SPAK ka kërkuar sekuestrimin e çdo pasurie që personi nën hetim posedon në territorin francez.
“Është një proces në zhvillim e sipër. Njoftimi do të dalë së shpejti. Kemi kërkuar të sekuestrohet çdo pasuri që posedon personi në fjalë në këtë shtet. Nuk ka thjesht avionë, por ka edhe pasuri të tjera”, deklaroi Braho.
Kreu i SPAK nuk dha detaje për llojin dhe vlerën e pasurive të tjera që janë identifikuar në Francë.
Procedura pritet të zhvillohet në bashkëpunim me autoritetet franceze, në kuadër të hetimit ndaj Beqirajt.
