Një kompani e re (startup) po bën një përpjekje shumë ambicioze për të sfiduar Boeing, aktualisht prodhuesin e vetëm të madh amerikan të avionëve komercialë, shkruan Wall Street Journal.
Avioni me të cilin JetZero synon ta arrijë këtë është po aq revolucionar sa edhe ambicia e saj, shkruan Benjamin Katz. Ai ngjan më shumë me një manta ray (peshk manta) sesa me modelin tradicional “tub me krahë”, i cili ka qenë standardi në aviacion për më shumë se 70 vjet.
Nëse JetZero arrin sukses, avioni i saj me krah të integruar me trupin (blended-wing aircraft) do të shënojë ndryshimin më të madh në projektimin e avionëve të pasagjerëve që nga koha e avionit supersonik Concorde.
Avioni ka katër korridore dhe është projektuar të fluturojë afërsisht 3,000 metra me lart se avionët e sotëm. Projektet fillestare parashikojnë zëvendësimin e dritareve të pasagjerëve me ekrane dixhitale, ndërsa për të kompensuar mungesën e tyre do të ketë një çati xhami (skylight) që lejon dritën natyrale të ndriçojë kabinën. Çdo sedilje do të ketë edhe ndarjen e vet për bagazhin e dorës mbi kokë.
Ambicia e kompanisë me seli në Long Beach, Kaliforni, vjen pas disa dekadash të vështira për industrinë amerikane të ndërtimit të avionëve. Dikur kjo industri dominohej nga tre gjigantë industrialë që prodhonin rreth 90% të avionëve komercialë në botë, ndërsa sot Boeing lufton i vetëm në këtë sektor.
Sekreti i JetZero është se avioni i saj revolucionar nuk është në të vërtetë aq i ri sa duket. Pothuajse të gjithë përbërësit e modelit Z4—nga sistemet e kontrollit deri te motorët—janë marrë nga avionë ekzistues, që do të thotë se ata kanë marrë tashmë miratimin e Administratës Federale të Aviacionit të SHBA-së (FAA).
Risia kryesore nuk janë pjesët, por forma në të cilën JetZero i ka bashkuar ato. Megjithatë, edhe koncepti i avionit me krah të integruar me trupin nuk është i ri; ai daton që nga ditët e para të historisë së aviacionit. /skyweb.al
