Ushqimet ultra të përpunuara (UPF) janë gjithnjë e më të pranishme në tryezat tona, duke u gjetur në produkte të zakonshme si akulloret, buka, salcat e gatshme, ushqimet e lehta dhe batonët. Ekspertët paralajmërojnë se konsumimi i shpeshtë i këtyre produkteve lidhet me një rrezik më të lartë për obezitet, diabet të tipit 2, sëmundje kardiovaskulare dhe forma të ndryshme të kancerit, shkruan BBC.
Megjithatë, specialistët theksojnë se shmangia e ushqimeve ultra të përpunuara nuk kërkon ndryshime të mëdha në stilin e jetesës. Përgatitja në shtëpi e alternativave të thjeshta, si akullorja me banane dhe kakao, bagelët me miell dhe kos, salca e domates me përbërës natyralë, salcat për stir-fry, kokoshkat dhe batonët me tërshërë, mund të ndihmojë në reduktimin e konsumit të aditivëve, sheqerit dhe kripës së tepërt.
Ekspertët rekomandojnë që konsumatorët të lexojnë me kujdes etiketat e produkteve dhe të zgjedhin ushqime me sa më pak përbërës. Sa më e shkurtër dhe më e thjeshtë të jetë lista e përbërësve, aq më e vogël është mundësia që produkti të jetë ultra i përpunuar.
Pavarësisht se jo çdo ushqim i përpunuar është domosdoshmërisht i dëmshëm, një dietë e bazuar kryesisht në produkte të freskëta dhe gatime të përgatitura në shtëpi mbetet një nga mënyrat më efektive për të përmirësuar shëndetin dhe për të ulur rrezikun e sëmundjeve kronike. /skyweb.al
