Temperaturat e larta gjatë verës rrisin nevojën e organizmit për lëngje, ndërsa mungesa e tyre mund të ndikojë edhe në funksionimin e veshkave.
Nefrologia Dhurata Golemi shpjegon se dehidratimi mund të shoqërohet me pasoja për shëndetin.
“Veshka ka funksione shumë të rëndësishme në organizëm, funksione jetike. Në momentin kur njeriu nuk merr sasinë e duhur të lëngjeve, volumi i gjakut në organizëm ulet dhe njëkohësisht ulet edhe furnizimi me gjak që i bëhet veshkave, ku futen pacientë me problem kardiake, pacientë me tensione të larta, me diabet e me radhë”, tha ajo.
Përveç ndjesisë së etjes, organizmi jep edhe sinjale të tjera që mund të tregojnë mungesën e lëngjeve.
“Mund të vërehet një lodhje, dobësi, një lloj përgjumjet. Pacienti ka tharje gojë, etje për ujë. Duhet të jenë në kujdes, në kujdestari që të kujtohen, të pinë ujë, sepse pastaj përfundojnë në situata emergjente ku veshka del jashtë funksionit. Urina bëhet më e koncentruar, po bëhet një urinë e verdhë. Kjo tregon që organizmi vuan për ujë. Pra nuk ka marrë sasinë e duhur të lëngjeve”, tha nefrologia .
Krahas hidratimit po aq rëndësi ka edhe zgjedhja e lëngjeve që konsumojmë gjatë ditës.
“Një njeri normal duhet t’i marrë sidomos në këto ditë duhet marrë 2 litra ujë në ditë sepse uji është miku më i mirë i organizmit aq më tepër i veshkave. Veshka është filtri i organizmit. Filtron produktet e dëmshme. Në momentin që ti s’ke pi ujë, ti e ke prishur këtë filtër”, tha mjekja.
Konsumimi i mjaftueshëm i lëngjeve dhe reagimi ndaj shenjave të dehidratimit janë ndër mënyrat më të thjeshta për të mbrojtur organizmin gjatë temperaturave të larta. /rtsh.al
