Gjermania, Italia, Austria, Polonia, Portugalia dhe Spanja po kërkojnë vendosjen e një takse në nivel të Bashkimit Evropian mbi fitimet e jashtëzakonshme të kompanive të naftës, të cilat kanë shënuar rritje të ndjeshme si pasojë e luftës në Lindjen e Mesme.
Sipas një letre të siguruar nga Euronews, ministrat e Financave të pesë vendeve dhe ministri i Ekonomisë i Spanjës i janë drejtuar ministrit irlandez të Financave, duke kërkuar që çështja të përfshihet në axhendën e takimit të ardhshëm të ministrave të Financave të BE-së, që do të mbahet në Dublin.
Në letër theksohet se kompanitë e naftës po përfitojnë nga marzhe të larta, veçanërisht në sektorin e produkteve të rafinuara, të cilat po rriten më shpejt se çmimet e naftës bruto.
“Në mbarë botën po përjetojmë një nga goditjet më të mëdha të ofertës në dekada”, thuhet në deklaratë, ndërsa nënvizohet edhe shqetësimi në rritje për pasojat e krizës mbi koston e jetesës.
Ministrat kërkojnë krijimin e një kuadri të përbashkët evropian për taksimin e fitimeve të jashtëzakonshme, duke iu referuar edhe përvojës së BE-së me taksën e përkohshme të vendosur në vitin 2022, pas pushtimit rus të Ukrainës.
Ministri gjerman i Financave, Lars Klingbeil, ka deklaruar më herët se kompanitë energjetike nuk duhet të përfitojnë në mënyrë të padrejtë në kurriz të konsumatorëve gjatë krizave. Një burim nga ministria gjermane tha se fitimet e tepërta të krijuara gjatë krizës duhet t’u rikthehen konsumatorëve.
Disa nga vendet nënshkruese e kanë mbështetur edhe më herët idenë e një takse mbi fitimet e kompanive të naftës.
Gjigantët e energjisë kanë regjistruar fitime të konsiderueshme që nga nisja e operacioneve ushtarake amerikane dhe izraelite kundër Iranit në shkurt. Konflikti ka shkaktuar ndërprerje të mëdha në transportin detar përmes Ngushticës së Hormuzit, një prej rrugëve më strategjike të furnizimit me energji në botë.
Nisma e gjashtë vendeve synon të rikthejë në qendër të debatit evropian çështjen e mënyrës se si duhet të trajtohen fitimet e jashtëzakonshme të kompanive energjetike në periudha krizash, veçanërisht kur ato shoqërohen me rritje të ndjeshme të kostos për konsumatorët.
