Ryanair do të operojë më pak fluturime nga sa kishte planifikuar gjatë sezonit dimëror, nga nëntori 2026 deri në mars 2027, për të kufizuar kostot që po vijnë nga shtrenjtimi i karburantit.
Kompania ka ulur parashikimin e pasagjerëve për të gjithë vitin financiar nga 216 milionë në 214 milionë, ndërsa trafiku gjatë dimrit pritet të mbetet afërsisht në nivelet e një viti më parë.
Ryanair ka siguruar përmes kontratave të mbrojtjes së çmimit rreth 80% të karburantit që i nevojitet deri në mars 2027, me një çmim pranë 67 dollarëve për fuçi.
Problemi mbetet pjesa tjetër e pambuluar, e cila blihet me çmimet aktuale të karburantit të avionëve, të cilat kompania i vlerëson rreth 140 dollarë për fuçi.
Reduktimi i fluturimeve pritet t’i ulë humbjet e parashikuara për sezonin dimëror me rreth 70 deri në 100 milionë euro.
Vendimi vjen pavarësisht rezultateve pozitive të gushtit, kur Ryanair transportoi 22.2 milionë pasagjerë, ose 6% më shumë se një vit më parë.
Koeficienti i mbushjes së avionëve arriti në 96%, duke treguar se kërkesa për fluturime mbetet e lartë.
Megjithatë, kompania paralajmëron se nëse çmimet e naftës qëndrojnë të larta edhe gjatë verës 2027, mund të ketë një rritje të ndjeshme të tarifave për fluturimet me distancë të shkurtër në Evropë.
Kjo do të thotë se shtrenjtimi i karburantit mund të reflektohet jo vetëm në më pak fluturime gjatë dimrit, por edhe në bileta më të shtrenjta gjatë sezonit të ardhshëm veror. /skyweb.al
