Hetimet për skandalin AKSHI duket se kanë arritur te drejtuesja e SHISH si edhe ish-kreu i Policisë së Shtetit Ilir Proda. Me kërkesë të SPAK, GJKKO ka caktuar masën “arrest në shtëpi” dhe pezullimin nga detyra për drejtoreshën e SHISH-it, Vlora Hyseni.
Akuzat konkrete ndaj saj nuk janë bërë ende publike, ndërsa prokurori i çështjes së bujshme është Bledar Maksuti.
Në të njëjtin operacion po kontrollohet banesa e ish-drejtorit të Policisë së Shtetit, Ilir Proda. Sipas informacioneve paraprake, është urdhëruar edhe kontroll personal ndaj tij. Deri tani nuk është njoftuar ndonjë masë sigurie për Prodën.
Dosja AKSHI lidhet me dyshimet për paracaktimin e tenderëve të teknologjisë, ushtrimin e presionit ndaj konkurrentëve dhe qarkullimin e parave përmes faturave të shërbimeve që po verifikohen.
Në qendër të hetimit janë biznesmenët Ergys Agasi dhe Ermal Beqiri, kompania e këtij të fundit “Soft & Solution”, si dhe ish-drejtoresha e AKSHI-t, Mirlinda Karçanaj.
Agasi u arrestua në Elbasan në gusht, ndërsa Beqiri u arrestua në Francë në korrik dhe kërkohet ekstradimi i tij. Karçanaj dhe ish-zëvendësja e saj, Hava Delibashi, u vendosën fillimisht në arrest shtëpie; masa ndaj Karçanajt u ndryshua më pas në “detyrim paraqitje”.
Përfshirja e Hysenit dhe arsyet e kontrolleve te Proda pritet të sqarohen në një reagim zyrtar nga SPAK në orët në vijim. /skyweb.al
