Operacioni i SPAK për dosjen AKSHI është shtrirë në strukturat e sigurisë. GJKKO ka caktuar masën “arrest në shtëpi” dhe pezullimin nga detyra për drejtoreshën e SHISH-it, Vlora Hyseni. Në të njëjtën kohë, po kontrollohet banesa e ish-drejtorit të Policisë së Shtetit, Ilir Proda, si dhe banesa të zyrtarëve të tjerë. Deri tani nuk është njoftuar masë sigurie ndaj Prodës.
Gazetarja Klodiana Lala e ka cilësuar masën ndaj një drejtuesi të SHISH-it si rast të paprecedentë. Sipas raportimit të saj, masa ndaj Hysenit nuk ishte ekzekutuar ende, pasi ajo nuk ndodhej në Shqipëri. Akuzat konkrete dhe roli që SPAK i atribuon në dosje nuk janë bërë publike.
Hetimi për AKSHI-n nisi nga dyshimet se tenderët e teknologjisë paracaktoheshin për kompani të caktuara dhe se ndaj operatorëve konkurrues ushtrohej presion. Skyweb.al ka raportuar se në qendër të verifikimeve është kompania “Soft & Solution” e Ermal Beqirit, si dhe fatura shërbimesh përmes të cilave dyshohet se qarkullonin paratë e përfituara nga kontratat publike.
Në dosje janë përfshirë biznesmeni Ergys Agasi dhe ish-drejtoresha e AKSHI-t, Mirlinda Karçanaj. Agasi u arrestua në Elbasan në gusht, pasi kishte qenë për muaj me radhë në kërkim. Beqiri u arrestua në Francë në korrik dhe Shqipëria ka kërkuar ekstradimin e tij. Ndaj të dyve ishte caktuar masa “arrest në burg”.
Karçanaj dhe ish-zëvendësja e saj, Hava Delibashi, u vendosën fillimisht në arrest shtëpie. Sipas raportimit të Skyweb.al në gusht, masa ndaj Karçanajt ishte ndryshuar më pas në “detyrim paraqitje”. Hetimi përfshin dyshime për shkelje të barazisë në tendera, konkurrencë të paligjshme nëpërmjet dhunës, heqje të paligjshme të lirisë, grup të strukturuar kriminal dhe pastrim parash.
Operacioni i sotëm zgjeron rrethin e personave të përfshirë në veprimet hetimore. Se çfarë lidhjeje kanë Hyseni dhe drejtuesit e Policisë me skemën e dyshuar të tenderëve, pritet të sqarohet nga vendimi i GJKKO-së dhe njoftimi zyrtar i SPAK. /skyweb.al
