Përplasja mes Behgjet Pacollit dhe Valon Ademit për Aeroportin e Vlorës po hyn në një fazë edhe më të rëndë, ndërsa projekti strategjik rrezikon të mbetet peng i një konflikti privat mes ortakëve.
MABCO Constructions SA, kompania e lidhur me Behgjet Pacollin, i ka dërguar një letër institucioneve shqiptare, ku kërkon ndërhyrjen e shtetit për situatën e krijuar në Aeroportin Ndërkombëtar të Vlorës. Letra i është drejtuar Ministrisë së Infrastrukturës dhe Energjisë, Avokaturës së Shtetit, Zyrës së Kryeministrit dhe institucioneve të tjera përgjegjëse.
Në letër, MABCO i vendos shtetit shqiptar afat deri më 28 maj 2026 për të ndërhyrë, në të kundërt paralajmëron nisjen e arbitrazhit ndërkombëtar kundër Republikës së Shqipërisë.
Kompania pretendon se është përjashtuar nga kantieri dhe nga kontrolli real i investimit, ndërsa akuzon 2A Group se po tenton të marrë kontrollin faktik të projektit përmes një administrimi të kontestuar të shoqërisë Vlora International Airport.
Sipas MABCO, më 14 maj 2026 është lëshuar një njoftim për ndërprerjen e marrëdhënieve të ndërtimit, të cilin kompania thotë se e ka refuzuar më 16 maj. Më pas, sipas saj, më 17 maj është komunikuar kufizimi i aksesit në kantier, ndërsa më 18 maj përfaqësuesve, inxhinierëve, punonjësve dhe nënkontraktorëve të MABCO u është ndaluar fizikisht hyrja në kantier.
Kompania pretendon se ky përjashtim nuk mbështetet në një vendim gjyqësor të formës së prerë, në një vendim të Autoritetit Kontraktues apo në një akt tjetër të vlefshëm ligjor që do të justifikonte largimin e saj nga projekti.
Në letër ngrihen akuza edhe për përdorimin e Policisë së Shtetit në zbatimin praktik të një vendimi privat të kontestuar, duke krijuar, sipas MABCO, një situatë faktike në favor të 2A Group.
MABCO kërkon që deri më 28 maj shteti shqiptar të garantojë akses të menjëhershëm dhe të mbrojtur në kantier për kompaninë dhe stafin e saj, të ndalojë përdorimin e policisë për përjashtimin e palëve nga kantieri, të sigurojë lirinë e lëvizjes së punonjësve dhe specialistëve, të ruajë provat dhe të zhbllokojë pajisjet kritike për certifikimin e aeroportit.
Kompania kërkon gjithashtu një takim urgjent institucional me Ministrinë e Infrastrukturës, Njësinë e Zbatimit të Projektit, Autoritetin e Aviacionit Civil, Albcontrol, Inxhinierin e Pavarur dhe BKT.
Në aspektin financiar, MABCO pretendon se vlera ekonomike e vënë në rrezik shkon në 250 deri në 300 milionë euro. Sipas saj, mosveprimet e institucioneve shqiptare përbëjnë shkelje të Marrëveshjes së Koncesionit dhe të Traktatit Dypalësh të Investimeve Zvicër Shqipëri.
Por përtej pretendimeve të njërës palë, problemi kryesor mbetet se konflikti mes Behgjet Pacollit dhe Valon Ademit, që sipas burimeve ka nisur më herët me përplasje mes tyre në Libi, duket se tashmë është zhvendosur në Shqipëri. Të dy palët kanë zgjedhur t’i lajnë hesapet në një projekt publik strategjik, duke vënë në pikëpyetje funksionimin e Aeroportit të Vlorës.
Ky nuk është më thjesht një konflikt biznesi mes dy ortakëve. Aeroporti i Vlorës është një vepër strategjike për ekonominë, turizmin dhe imazhin ndërkombëtar të vendit. Çdo vonesë në hapjen dhe certifikimin e tij ka kosto direkte për sezonin turistik, për kompanitë ajrore, për jugun e vendit dhe për besueshmërinë e Shqipërisë ndaj investimeve të mëdha.
Në këtë pikë, shteti shqiptar nuk mund të sillet si spektator. Nëse palët private vijojnë të përplasen për kontrollin e projektit, institucionet duhet të garantojnë që interesi publik, siguria aeroportuale dhe hapja e aeroportit të mos mbeten peng i një sherri biznesmenësh.
Në mungesë të një ndërhyrjeje të qartë institucionale, Aeroporti i Vlorës rrezikon të kthehet nga një projekt që duhet të ndihmonte turizmin shqiptar, në një shembull se si konfliktet private mund të sabotojnë një vepër strategjike kombëtare.
