Kryeministri Edi Rama ka mbërritur mëngjesin e kësaj të hëne në qytetin e Vlorës, ku ka zhvilluar një takim pune në ambientet e Bashkisë. Në këtë vizitë, ai është pritur nga kryebashkiaku Ermal Dredha dhe është shoqëruar nga ministri i Mbrojtjes Pirro Vëngu dhe drejtuesi politik i Partisë Socialiste për qarkun, Bledi Çuçi.
Vizita vjen pak ditë pasi 21 drejtues të Bashkisë Vlorë dhanë dorëheqjen, në vijim të një turi paralajmërimesh nga kryeministri Rama, i cili u ka lënë afat institucioneve deri më 15 korrik për të emëruar drejtuesit e rinj. Në fokus të deklaratave të tij të fundit kanë qenë zaptimet e hapësirave publike dhe paralajmërimet për masa të forta nëse situata nuk ndryshon.
Në Vlorë, aksioni për lirimin e hapësirave publike është intensifikuar edhe gjatë natës. Zona bregdetare e “Lungomares” është kthyer në epiqendër të ndërhyrjeve, me prani të shtuar të zyrtarëve vendorë dhe strukturave të bashkisë.
Kryetari i Bashkisë, Ermal Dredha, ka bërë thirrje të qarta për subjektet që kanë zaptuar hapësira publike: “Nuk do të ketë më asnjë tolerim për ata që pengojnë lëvizjen e lirë të qytetarëve, sidomos në zonat për këmbësorë,” u shpreh ai.
Sipas Bashkisë, operacioni synon të kthejë qytetit hapësirat publike të pushtuara prej vitesh, veçanërisht në vijën bregdetare që gjatë verës frekuentohet masivisht nga pushues vendas dhe të huaj. /skyweb.al
