Polonia mbylli gjatë natës dy aeroporte për arsye sigurie, pas sulmeve intensive ajrore ruse në Ukrainë, njoftuan sot autoritetet e aviacionit.
“Për të garantuar lirinë e operimit të aviacionit ushtarak, aeroportet në Rzeszów dhe Lublin pezulluan përkohësisht fluturimet”, bëri të ditur agjencia kombëtare e kontrollit të trafikut ajror, PANSA, përmes platformës X.
Të dy qytetet ndodhen pranë kufirit me Ukrainën.
Më herët, ushtria polake njoftoi se avionët e saj luftarakë ishin ngritur në ajër së bashku me avionë të NATO-s për të mbrojtur hapësirën ajrore të Polonisë. Sipas autoriteteve ushtarake, nuk u regjistrua asnjë shkelje e hapësirës ajrore polake.
Operacioni përfundoi rreth orës 08:00 të mëngjesit.
Polonia ka intensifikuar ngritjen e avionëve luftarakë pas sulmeve ajrore ruse në rajonet ukrainase pranë kufirit, por zakonisht këto masa nuk çojnë në mbylljen e aeroporteve civile. /skyweb.al
