Mosha në të cilën një person fillon të pijë duhan ka një ndikim të madh në rrezikun për sëmundje të zemrës, madje më të madh sesa numri i viteve që ka pirë duhan, sugjeron një studim i ri.
Sipas shkencëtarëve nga Koreja e Jugut, fillimi i pirjes së duhanit para moshës 20 vjeç mund të dyfishojë rrezikun e infarktit dhe goditjes në tru, edhe nëse personi e ka lënë duhanin prej dekadash. Studiues nga Spitali Universitar Kombëtar i Seulit analizuan të dhënat shëndetësore të mbi 9 milionë të rriturve.
Ata zbuluan se personat që kishin nisur të pinin duhan para moshës 20 vjeç kishin rrezik më të lartë për infarkt dhe goditje në tru, krahasuar me ata që kishin filluar pas moshës 30 vjeç.
“Fillimi i pirjes së duhanit në moshë të hershme lidhet me rritjen e rrezikut për infarkt të miokardit dhe goditje në tru,” shkruajnë autorët e studimit në revistën Nature.
“Masat parandaluese kundër duhanpirjes duhet të fokusohen veçanërisht tek adoleshentët dhe të rinjtë.”
Pirja e duhanit është një ndër shkaqet kryesore të sëmundjeve kardiovaskulare, por edhe e problemeve të tjera shëndetësore, si sëmundjet e mushkërive dhe kanceri.
Kimikatet që përmban duhani e bëjnë më të lehtë ngjitjen e substancave yndyrore në muret e arterieve, duke i bllokuar ato dhe duke reduktuar qarkullimin e gjakut. Nëse bllokohen arteriet që furnizojnë zemrën me gjak, kjo mund të çojë në infarkt. Ndërkohë, goditja në tru ndodh kur bllokohen arteriet që furnizojnë trurin.
Hulumtimet tregojnë se sasia e duhanit që pi një person lidhet drejtpërdrejt me rrezikun për sëmundje të zemrës dhe goditje në tru, sa më shumë paketa dhe për sa më shumë vite, aq më i lartë është rreziku.
Megjithatë, pak studime janë fokusuar tek mosha në të cilën njerëzit fillojnë të pinë duhan.
“Në këtë studim synuam të hetojmë më tej rolin e fillimit të hershëm të duhanpirjes në rrezikun e sëmundjeve kardiovaskulare,” shkruajnë studiuesit, të udhëhequr nga Jung Hun Koh.
“Ne hipotezuam se fillimi i duhanit në moshë të re do të ishte një faktor i pavarur rreziku për infarkt, goditje në tru dhe vdekje nga çdo shkak.”
Studimi përfshiu 9,295,979 të rritur koreanë që kishin kryer kontrolle shëndetësore në vitin 2009 dhe që nuk kishin histori të sëmundjeve të zemrës apo goditjes në tru. Rreth 3.7 milionë prej tyre ishin duhanpirës.
Bazuar në të dhënat e vetëdeklaruara përmes pyetësorëve shëndetësorë, studiuesit analizuan moshën e fillimit të duhanpirjes, ekspozimin total ndaj duhanit (i matur në “vite-pako”) dhe statusin e tyre si duhanpirës aktualë ose ish-duhanpirës.
Nga ky grup, pothuajse një e katërta kishin filluar të pinin duhan para moshës 20 vjeç, ndërsa 2 për qind kishin nisur para moshës 15 vjeç.
Më pas, studiuesit analizuan të dhënat për të identifikuar se kush kishte pësuar infarkt, goditje në tru ose kishte ndërruar jetë për çfarëdo shkaku.
Ata i kushtuan vëmendje të veçantë moshës së fillimit të duhanpirjes dhe sasisë totale të duhanit të konsumuar gjatë jetës. Kjo matet me njësi të quajtura “vite-pako”, të cilat llogariten duke shumëzuar numrin e paketave të pira në ditë me numrin e viteve të duhanpirjes, për të vlerësuar ekspozimin e përgjithshëm ndaj duhanit. /skyweb.al
