Shqipëria do t’i nënshtrohet një fotografimi të ri ajror për të përditësuar hartat, të cilat nuk janë rifreskuar prej rreth një dekade. Fondi Shqiptar i Zhvillimit (FSHZH) ka lidhur një kontratë me kompaninë turke Mescioğlu Mühendislik ve Müşavirlik A.Ş., me vlerë rreth 265 milionë lekë (2.65 milionë euro).
Projekti përfshin fotografim ajror dixhital, skanime LIDAR dhe krijimin e modeleve të terrenit dhe ortofotove, që do të shërbejnë si bazë e unifikuar gjeohapësinore për gjithë vendin.
Ky përditësim konsiderohet i domosdoshëm për shkak të zhvillimeve demografike dhe ekonomike, veçanërisht në turizëm dhe bujqësi, si dhe mungesës së të dhënave të sakta hartografike për investime dhe planifikim territorial.
Të dhënat e reja do të ndihmojnë në analizimin e fenomeneve si erozioni, ndryshimet në përdorimin e tokës, ndërtimet, fatkeqësitë natyrore dhe përmirësimin e sistemeve si regjistrimi i popullsisë dhe adresave.
