Lufthansa po përballet me një rritje dramatike të kostove të karburantit për shkak të konfliktit në Lindjen e Mesme, në një zhvillim që pritet të ndikojë jo vetëm kompaninë gjermane, por të gjithë industrinë europiane të aviacionit.
Sipas CNBC, kompania më e madhe ajrore e Gjermanisë raportoi se kostot shtesë të karburantit kanë arritur në rreth 1.7 miliardë euro, ose afro 2 miliardë dollarë, ndërsa konflikti në Lindjen e Mesme ka krijuar “sfida të mëdha” për operacionet e saj.
Rritja e fortë e çmimeve të naftës dhe karburantit të avionëve po godet rëndë linjat ajrore europiane, të cilat tashmë po përballen me presion të madh financiar përpara sezonit veror.
Për industrinë e aviacionit, karburanti mbetet një nga kostot më të mëdha operative, ndaj çdo rritje e çmimeve në tregjet ndërkombëtare reflektohet menjëherë tek kompanitë ajrore.
Konflikti në Lindjen e Mesme dhe tensionet në zonën e Hormuzit kanë shtuar frikën për ndërprerje të furnizimit global me naftë, duke çuar çmimet në nivele të larta.
Ekspertët paralajmërojnë se kjo situatë mund të sjellë pasoja direkte edhe për pasagjerët, përmes rritjes së çmimeve të biletave, reduktimit të fluturimeve dhe presionit mbi kompanitë low cost.
Lufthansa është një nga kompanitë më të ekspozuara në Europë për shkak të rrjetit të gjerë ndërkombëtar të fluturimeve dhe konsumit të lartë të karburantit, ndërsa kriza aktuale po konsiderohet si një nga sfidat më serioze të viteve të fundit për sektorin europian të aviacionit./skyweb.al
